Një konsorcium i madh turk ka fituar tenderin e koncensionit për mirëmbajtjen e Rrugës Durrës-Kukës, por brenda mazhorancës ka nisur një luftë e egër që ka gjasa të çojë në pezullimin e ri të kësaj kontrate.
Deputetë të rëndësishëm të shumicës qeverisëse, kryesisht PS-së, kanë nisur luftën ndaj kompanisë turke që fitoi në një garë të hapur, detajet e të cilit u bënë të ditur me hollësi nga Ministria e Transporteve.
Mirëpo ç’ndodhi: menjëherë pas fitimit të kontratës nga konsorciumi turk, pra bashkimi i disa kompanive nën emrin Vendeka Bilgi, është shkarkuar një batare e vërtetë mediatike kundër kësaj kompanie.
E nisur në një portal proqeveritar dhe më pas nga Top Channel, fushata e sulmit është përvijuar edhe nga kreu i Komisionit Parlamentar të Ekonomisë, Erjon Braçe, cili shkruan në Facebook: “Per shkak te konotacionit politik;
ESHTE NJE CESHTJE E BARAZVLEFSHME ME CESHTJEN E MIRNJOHUR, TE HETUAR E TE PA GJYKUAR, TE NDERTIMIT TE RRUGES RRESHEN-KALIMASH.
Edhe pse ekonomikisht, ne vlere eshte shume me pak, prapeseprape nuk zhbehet aspak nga kjo pikpamje.
Qeveria dhe qeverisja mund te marre nje kosto te paimagjinueshme nga ky koncesion.
Ju e dini fare mire pikpamjen time per koncesionet ne teresi dhe nuk dua ti rikthehem atij diskutimi; per nje arsye-rrugen e pambaruar dhe tejet te rrezikshme nga Miloti ne Morine.
Por, treguesit ekonomik te krahasueshem te kesaj kontrate, natyrisht qe duhen diskutuar hapur, pa fshehur asnje detaj, patjeter edhe nga pikpamja ligjore por edhe nga pikpamja e barres per qytetaret.
Po lexoj cdo gje qe shkruhet e po degjoj cdo gje qe thuhet keto tre dite, perfshire edhe cfare thote ministria e Transportit.
Por degjova tani Top Channel qe jep detaje te nje skandali te madh. Tamam atij qe i frikesohesha.
Ne tregues po e po. Por sipas Top Channel edhe ne aspektin e moslejimit te ankimit kunder vendimit te komisionit nen ministrine e Transportit. Kjo eshte e patolerueshme”!!
Vendimi ende nuk është publikuar nga Ministria e Transporteve, çka është detyrim ligjor, dhe si i tillë lind dyshimi për një rishqyrtim të çështjes që mund të çojë në një anulim të kontratës së koncensionit pë mirëmbajtjen e Rrugës së Kombit.’
Bie në sy fakti që fushatat kundër kompanive turke kanë gjetur një lob të madh në Parlament dhe po sulmohen koncensione të mëdha që i janë dhënë disa kompanive nga qeveria e kryeministrit Edi Rama.
Në Kosovë, firma turke Enka që ndërtoi autostradën Vërmicë-Prishtinë, nuk përjetoi sulmin që u bë në Shqipëri, ndërkohë që edhe disa kompani të tjera që kanë marrë përsipër të ndërtojnë disa hidrocentrale, po sulmohen nga disa grupime trans-politike.
Në Mirditë u sajuan disa protesta qytetarësh që degraduan edhe në ngjyrime religjoze, ndërsa në jug u përkrahën disa ambjentalistë që marrin fonde nga kompani të ndryshme për të ndikuar në vendimet politike.
Në këtë rast nuk është mirë të bësh avokatinë e askujt, por as për sulmin. Duhet gjykuar me kokë të ftohtë gjithë dokumentacioni, ndoshta edhe pyetur koncensionari, i cili mund të thirret në seancë pyetjesh në Komisionin Parlamentar të Ekonomisë, por edhe atë të Veprimtarisë Prodhuese.
Një debat i hapur dhe transparent do të bënte mirë më shumë sesa një fushatë sulmi që duket se krijon më shumë tym dhe krijon gjasa për luftë interesash konjukturale. /tesheshi.com/
