Nga Ylli Pata
Një skenar rus ka nisur të realizohet në Ballkan për destabilizimin e rajonit pas aksionit perëndimor për rrëzimin e Gruevskit dhe një kursi drejt Shteteve të Bashkuara të Amerikës të kryeministrit serb, Aleksandër Vuçiç.
Pikërisht, në kohën kur Vuçiç ndodhet në Nju Jork dhe Uashington për të marrë pjesë në një takim me Presidentin Barack Obama, në “kopshtin e mbrapëm” të Serbisë, Malin e Zi, ka nisur një aksion i ngjashëm me atë të Shkupit por në krah të kundërt.
Forcat politike proserbe kanë nisur një protestë pa afat në bulevardin qendror të Podgoricës, duke ngritur tenda dhe kanë shpallur aksionin për të rrëzuar qeverinë e Millo Gjukanoviçit që mbështetet nga grupimet që janë për një Mal të Zi të pavarur.
Gjukanoviç mbetet në pushtet pikërisht për arsye se opozita nuk është gjë tjetër vetëm pjesa proserbe që kërkon një marrëdhënie “vllazërore” me Beogradin dhe Moskën.
Që prej ditës së djeshme, siç mësohet nga burime diplomatike, janë alarmuar agjencitë perëndimore në rajon, të cilat kanë nisur një tur konsultimesh me qeveritë dhe institucionet e sigurisë, pasi ekziston rreziku i “efektit domino”.
“Janë të njëjtat skenarë të vitit 2013 që organizuan protestat në Mal të Zi, Bosnjë-Hercegovinë dhe ata për armët kimike në Shqipëri”, tha për tesheshi.com një ekspert që merret me çështjet e sigurisë.
Mali i Zi është një vend shumë i brishtë pasi ka një klasë politike të atrofizuar që rri në pushtet prej 25 vitesh pa lëvizur, edhe për efekt të inercisë të mospasjes së një alternative; pasi përballë saj gjendet një grupim i pastër proserb që ka votuar kundër pavarësisë në referendumin e 18 qershorit 2006 por edhe ka marrë pjesë në protestat e 2013-s.
Truste të fuqishme ekonomike ruse që kanë interesa në Ballkan kanë paguar në cash edhe njerëzit kryesorë që kanë marrë pjesë në protestat antiatomike në Tiranë, që kurrë nuk u sqarua se ç’përfaqësojnë.
Gjithçka erdhi pas një takimi që zhvilloi në Uashington kryeministri serb, Aleksandër Vuçiç, i cili u prit nga zv.presidenti i SHBA Joe Biden.
Në këtë takum u fol për një pjesëmarrje të Serbisë në gazësjellësat që furnizojnë Europën dhe e bëjnë atë të pavarur nga gazi rus. Në këtë takim, vetë Biden theksoi se pikërisht qëndrimi i Beogradit do të irritojë Rusinë, ndaj vlerësoi “kurajon e kryeministrit serb”.
Veprimtarët e Frontit Demokratik, një parti proserbe në Mal të Zi, kanë shpallur protestat maratonë dhe e kanë akuzuar kryeministrin Gjukanoviç për korrupsion, praktika jodemokratike dhe manipulim zgjedhjesh.
Kreu i DF-së, Andria Mandiç, ka deklaruar se do të përsëritet skenari i Shkupit ku opozitarët e Zaev ngritën çadra deri në arritjen e një marrëveshje politike me Gruevskin.
Por në fakt, kemi të bëjmë me interesa dhe mbështetje krejt të kundërta.
Në Tiranë, Shkup dhe Prishtinë, kanë mbërritur emisarë të agjencive të njohura perëndimorë. Në Tiranë si vend anëtar i NATO-s ndodhet një zyrë e rëndësishme e inteligjencës për të ruajtur stabilitetin jo vetëm të Shqipërisë por edhe të rajonit.
Prej disa muajsh NATO ka ngritur shtabe të saj në kufijtë me Rusinë për t`u ruajtur nga ndonjë ndërhyrje e mundshme, e ngjashme si ajo në Ukrainë. Por veprimi në Mal të Zi, nuk është ushtarak por subversiv. /tesheshi.com/
