Televizioni publik zviceran, RSI, para ndeshjes Shqipëri-Zvicër, që zhvillohet sot pasdite në Lens të Francës, ka lëshuar alarmin për mungesën e lojtarit 31-vjeçar, shqiptarit të lindur në Kosovë, por të natyralizuar si zviceran, Valon Berhamit.
Lojtari që jeton në zonën italishtfolëse të Zvicrës, konsiderohet nga trajneri serb i Zvicrës, Vladimir Petkoviç, si njeriu që ndikon më shumë tek shqiptarët e tjerë të Zvicrës për të hequr kompleksin e “tradhtarit”, e ka munguar në dy stërvitje radhazi. Ai ka shumë mundësi të mos luajë që nga minuta e parë.
Ndërkaq, analisti i ekipit kombëtar zvicerian, Vinzent Cavin, thekson në një deklaratë për RSI-në se skuadra e Zvicrës është një nga më të rejat në moshë, dhe, sipas të gjitha gjasave, vrapon më shumë se të tjerat në fushë. Pra, ka një përgatitje atletike mjaft të mirë. Dhe kjo do të jetë dhe “arma” më e fortë e ekipit të kryqkuqëve gjatë ndeshjes së sotme me kuqezinjtë. /tesheshi.com/
