Shpërthimi i çështjes “Shullazi” ditën e shtunë në mesditë ka ndodhur pikërisht dy ditë pas takimit të Kryeministrit Edi Rama me Presidentin Barack Obama dhe firmosjes së marrëveshjes mes Policisë Shqiptare dhe FBI-së Amerikane.
Një konferencë shtypi e ish-kryeministrit Berisha që denoncoi shantazhit ndaj kandidatit për rektor të Universitetit të Tiranës trazoi të gjithë ujërat ku u përmend emri i Emiljano Shullazit, i cili atë natë u arrestua nga policia në fillim dhe më pas iu bënë letrat nga prokuroria.
Që prej asaj të shtune ka nisur një tollovijë apo tronditje e madhe informacionesh që vijnë e më pas përgënjeshtrohen, apo edhe hidhen poshtë në lidhje me emrin e Emiljano Shullazit, i cili është kthyer në frazën që përmendet nga titrat apo titujt e portaleve thuajse një në 12 minuta.
Përmenden biznesmenë që janë shantazhuar, por që më pas emrat e përmendur e hedhin poshtë. Përmenden kandidatë për rektorë që në prokurori nuk japin asnjë deponim.
Thuhet se ka kamera që kanë filmuar shantazhin, por asgjë nuk bëhet publike.
Ndërkohë që prapavija e të gjithë kësaj zallamahije nuk kursen askënd, përmenden emra biznesmenësh të njohur pa fre që krijon një klimë terrori tek biznesi, i cili nuk di se kujt duhet t’i drejtohet.
“Shullazi” shpërtheu jo si një rast kriminal që mund të ndiqet nga policia dhe prokuroria dhe publiku të ndjekë zhvillimet e hetimeve duke u dhënë kohë që të kryhen të gjitha procedurat.
Çështja “Shullazi” po trajtohet tejekëput si një rast tipik politik për të furnizuar publikun me një kauzë apo ushqim të përditshëm që të trajtohet në mënyrën sa më të turbullt dhe të dizorientuar.
Deri tani janë dhënë dy versione të arrestimit të Shullazit: një në lokal dhe një në shtëpi. Janë dhënë versione të ndryshme të shantazhit të Mynur Konit, emrat e biznesmenëve të shantazhuar sipas mediave.
Ndër ta u përmend dhe emri i një sipërmarrësi serioz si Shefqet Kastrati dhe ai me anë të një njoftimi për shtyp e ka cilësuar si “gënjeshtër e ndyrë”.
E gjithë kjo aferë ka siç duket një synim ekstra zbardhjes të së vërtetës, por thjesht tymues në debatin politik të ditës. Por kush ishin ata që mund të kenë përfituar? Bën përshtypje fakti se kreu i opozitës, Lulzim Basha ka folur shumë pak vetëm një herë për këtë çështje.
Ish-kryeministri Sali Berisha ka qenë mjaft aktiv, natyrisht është në opozitë dhe ka synimet politike për t’ia mveshur kundërshtarit Shullazin. Ndërkohë aleati i Ramës, Ilir Meta, i cili ka marrëdhënie mjaft të afërta me Kryeprokurorin Llalla s’ka folur fare, madje as edhe ndonjë eksponent tjetër i LSI-së.
E njëjtë është situate si në javën e shkuar ku nuk u dha asnjë deklaratë për takimin e Edi Ramës në Shtëpinë e Bardhë…./tesheshi.com/
