Presidenti turk Rexhep Tajip Erdogan ka njoftuar se do të takohet me liderët e Francës, Gjermanisë dhe Rusisë në 5 mars për të diskutuar situatën në rajonin Idlib të Sirisë, ku gati një milion njerëz janë larguar nga shtëpitë e tyre për shkak të ofensivës së fundit nga regjimi sirian.
“Unë ia bëra të qartë Vladimir Putinit se ne ishim të vendosur për Idlib. Unë gjithashtu ia thashë këtë Angela Merkelit dhe Emmanuel Macronit” tha Erdogan.
“Më 5 mars, ne do të takohemi me Putin, Macron dhe Merkel për të diskutuar përsëri”, njoftoi lideri turk.
Pas një seri bisedash telefonike të premten, Merkel dhe Macron shprehën shqetësimin për situatën në Idlib dhe bënë thirrje për përfundimin e konfliktit, ndërsa Kremlini tha se po mendonte të zhvillonte një takim me katër të parët.
Presidenti turk Rexhep Tajip Erdogan i bëri thirrje homologut rus Vladimir Putin që të “frenojë” regjimin sirian në Idlib mes një aktiviteti të fortë diplomatik për t’i dhënë fund konfliktit dhe situatave të vështira humanitare.
Në një intervistë telefonike me Putin, Erdogan “theksoi se regjimi duhet të ndalet në Idlib dhe se kriza humanitare duhet të ndalet”, tha zyra e presidentit turk.
Kremlini raportoi se të dy udhëheqësit diskutuan për intensifikimin e negociatave mbi Idlibin për të ulur tensionet dhe për të kaluar në një armëpushim.
Putini tha, sipas një deklarate të Kremlinit, se ai ishte “jashtëzakonisht i shqetësuar” për “veprimin agresiv” të rebelëve të Idlibit.
Para kësaj bisede, Erdogan pati një bisedë telefonike dhe me Presidentin Macron dhe Kancelaren Angela Merkel, duke bërë thirrje për veprime konkrete për të parandaluar një katastrofë humanitare.
Ata i thanë atij, sipas Reuters, se kriza humanitare në Idlib po kërkonte një zgjidhje politike dhe se të tre, së bashku me Putin, duhet të takohen sa më shpejt që të jetë e mundur. /tesheshi.com/
