Presidenti kinez Xi Jinping njoftoi të premten për Presidentin e SHBA Donald Trump se ai do të kishte mbështetjen kineze në luftën kundër koronavirusit, ndërsa në të njëjtën kohë Wuhan-i, qyteti kinez nga ku filloi epidemia, ishte i hapur për trafik.
Shtetet e Bashkuara kanë numrin më të madh të pacientëve në botë me afro 85,000 infeksione. Spitalet në New York dhe New Orleans po luftojnë me një valë pacientësh.
Në Wuhan, i cili u bllokua plotësisht për dy muaj, mund të rihyet, por jo të dilet, që nga mëngjesi i së premtes, sipas Reuters.
Provinca Hubei, kryeqyteti i së cilës është Wuhan-i, të mërkurën hoqi kufizimet e trafikut për të gjitha vendet, përveç Wuhan-it, e cila do t’i lejojë njerëzit të largohen që nga 8 prilli.
Lufta midis Pekinit dhe Uashingtonit
Mbështetja e Xi për SHBA, të cilën ai e përcolli në një intervistë telefonike me Trump, vjen në një kohë të luftës verbale midis Pekinit dhe Uashingtonit për çështje të ndryshme, përfshirë këtu edhe epideminë e virusit koronar.
Trump dhe zyrtarë të tjerë amerikanë kanë akuzuar Kinën për mostransparencë, dhe Trump shpesh e ka quajtur Corona-n një “virus kinez”, duke zemëruar Pekinin.
Xi i përsëriti Trump se Kina ishte e hapur dhe transparente rreth epidemisë, tregon një transkriptim i një pjese të bisedës të lëshuar nga Ministria e Jashtme kineze.
Trump tha në Twitter se kishte diskutuar në mënyrë të detajuar epideminë.
“Kina ka kaluar shumë dhe ka shumë njohuri për virusin”, tha Trump. “Ne punojmë ngushtë së bashku. Ne e vlerësojmë shumë atë,” shtoi ai.
Organizata Botërore e Shëndetit ka njoftuar se pret që Shtetet e Bashkuara, me 17.099 raste të reja dhe 281 vdekje në 24 orët e fundit, të bëhen fokusi i ri i epidemisë. /tesheshi.com/
