Policia merr shumë shpesh telefonata të çuditshme. Agjentët e policisë në provincën kanadeze Newfoundland i janë përgjigjur një telefonate emergjente të një qytetareje, e cila siç duket nuk ka qenë aspak e kënaqur nga pica që kishte porositur dhe ia kishin sjellë në shtëpi.
“Personi që telefonoi kishte një problem me kompaninë që i kishte dorëzuar picën: nuk kishte mjaftueshëm djathë dhe ajo nuk ishte e kënaqur nga përgjigja që kishte marrë”, – shpjegon zëdhënësi i forcave të rendit Geoff Higdon.
“Nuk e di nëse mendonte me të vërtetë se do të mund të bënim diçka për të. Ne i sugjeruam të telefononte përgjegjësin e picerisë dhe jo policinë”, – tregon Higdon për CBC.
Telefonata të tilla në numrin e policisë nuk janë dhe aq të pabesueshme. “Na telefonojnë për t’u ankuar edhe për atë që dëgjojnë në radio”, – ka shtuar Higdon. /tesheshi.com/
