Aktori Harrison Ford është nën hetim pas një incidenti në një aeroport në Kaliforni javën e kaluar.
Konkretisht, ky aktor, i apasionuar pas aviacionit, po drejtonte një aeroplan në aeroportin Haëthorne në Los Angeles kur kaloi pistën në një kohë kur një aeroplan tjetër po përpiqej të ateronte.
“Z. Ford kaloi pistën e vetme me aeroplanin e tij pasi dëgjoi udhëzimet nga ATC. Ai menjëherë pranoi gabimin dhe kërkoi falje,” tha një zëdhënës i aktorit për CNN.
Për fat të mirë, askush nuk u plagos dhe nuk ekzistonte rreziku i përplasjes, shtoi ai.
Një zëdhënës i Administratës Federale të Aviacionit tha që ata po hetonin incidentin.
Sipas mediave, një regjistrim audio i incidentit zbulon se operatori i tha Fordit të priste pak në pistën për shkak të trafikut. Pas disa çastesh, operatori përsëriti porositë e tij me një ton më të mprehtë.
“Unë ju thashë të qëndroni. Ju duhet të dëgjoni,” tha ai.
“Më falni zotëri, unë kam kuptuar krejt të kundërtën. Ndjej shumë keqardhje,” u përgjigj Ford.
Kjo nuk është hera e parë që Ford ka bërë gabimin e pilotimit. Ai aksidentalisht u ul në pistën e gabuar në aeroportin Santa Ana në vitin 2017.
Dy vjet më parë, Ford u shtrua në spital pasi u ul në një fushë golfi. Në atë kohë, një hetues në Bordin Kombëtar të Sigurisë së Transportit tha se motori i avionit kishte pësuar defekt.
Po ashtu, në vitin 1999, Ford bëri një ulje emergjente në një shtrat lumi ndërsa fluturonte me një helikopter. /tesheshi.com/
