Qeveria italiane ka mohuar spiunimin ndaj gazetarëve dhe aktivistëve që ndihmonin emigrantët me softuer special dhe tha se do të bashkëpunonte me një hetim pasi të paktën shtatë telefona celularë në Itali u hakeruan duke përdorur teknologjinë e mbikëqyrjes ushtarake.
Dhjetra përdorues të aplikacionit WhatsApp, i cili është në pronësi të Meta-s, u njoftuan më 31 janar se kishin qenë objektivi i një sulmi hakerimi të kryer duke përdorur teknologjinë e kompanisë kibernetike izraelite Paragon Solutions, raporton AP.
Në një deklaratë nga zyra italiane e Meta-s, WhatsApp tha se kishte penguar “një fushatë spiunazhi Paragon, e cila synonte disa përdorues, duke përfshirë gazetarë dhe anëtarë të shoqërisë civile”.
Pasi The Guardian raportoi për rastin, qeveria italiane konfirmoi më 5 shkurt se të paktën shtatë telefona celularë në Itali ishin shënjestruar në sulm, duke thënë se i kishte kërkuar Agjencisë Kombëtare të Sigurisë Kibernetike të kryente një hetim.
Sulmet në të gjithë Evropën
Sulmi synonte gjithashtu telefona celularë me numra nga Belgjika, Greqia, Letonia, Lituania, Austria, Qiproja, Republika Çeke, Danimarka, Gjermania, Holanda, Portugalia, Spanja dhe Suedia.
Ministri italian për Marrëdhëniet me Parlamentin Luca Ciriani u tha ligjvënësve në dhomën e ulët të parlamentit se qeveria ka pasur një kontratë me Paragon Solutions për shumë vite për të siguruar kapacitetin e mbledhjes së inteligjencës për të luftuar terrorizmin dhe kërcënimet e tjera për sigurinë kombëtare.
Ciriani, megjithatë, këmbënguli se ligji ishte “respektuar rreptësisht” dhe mohoi se qeveria po përdorte teknologjinë në fjalë për të spiunuar ilegalisht gazetarët. /tesheshi.com/
