Shkarkimi i holandezit Frank de Boer është tani thuajse punë e mbaruar, dhe pritet vetëm konfirmimi zyrtar.
Në fakt, mendohej se ai do të lihej në detyrë gjer në nisje të pauzës së kampionatit italian për shkak të ndeshjeve të përfaqësueseve në nëntor, por duket se durimi i drejtuesve të Interit ka marrë fund.
Humbja ndaj Sampdorias, e pesta në kampionat, ka vulosur fatin e teknikut holandez, që ka humbur shtatë prej 14 takimeve të tij të para prej marrjes së detyrës.
Ashtu siç u njoftua dhe mbrëmë, stërvitjen e Interit sot pritet ta drejtojë tekniku i të rinjve, Stefano Vecchi.
Mediat elektronike italiane thonë se De Boer ka mbërritur në kompleksin sportiv të klubit e se po përshëndetet me lojtarët e me personelin përpara se të ketë një komunikim me drejtuesit e Interit.
Ish-trajneri i Lacios, Stefano Pioli, shihet si zëvendësuesi më i mundshëm i De Boer-it, por në ndeshjen e Ligës së Europës ndaj Sauthemptonit, që luhet të enjten, ekipi do të drejtohet nga Stefano Vecchi. /tesheshi.com/
