Ministrat teknikë të propozuar nga PD-ja kanë nisur një luftë të pashoq kundër vartësve të tyre nëpër ministri, të cilët i kanë gjetur nga administrat e ministrave socialiste.
Të paktën dy ministra të rinj janë në konflikt me sekretarët e përgjithshëm të ministrive përkatëse dhe kanë kërkuar shkarkimin e tyre nga detyra.
Bëhet fjalë për ministren e Arsimit dhe Sportit Mirela Karabina dhe atë të Drejtësisë Gazmend Bardhi.
Bardhi i ka mbyllur derën e ministrisë sot sekretares së përgjithshme të këtij institucioni Juliana Hoxha duke mos e lejuar të futet në zyrën e saj.
Më parë Bardhi kishte nxjerr një urdhër shkarkimi ndaj saj me argumentin se ka shkelur ligjin zgjedhor, pasi duke qenë kandidate për deputete në qarkun Tiranë nuk mund të jetë dhe zyrtare e administratës publike.
Nga ana tjetër ministrja e re e Arsimit ka një konflikt të hapur me Plarent Ndrecën, Sekretarin e Përgjithshëm të kësaj ministrie. Pasi e akuzoi publikisht se nuk zbaton urdhërat e saj për pezullimin e drejtorëve rajonalë arsimorë, Karabina e ka paditur penalisht vartësin e saj në Prokurorinë e Përgjithshme dhe në Prokurorinë e Rrethit Gjyqësor.
Ajo pretendon në kallëzimin penal se Ndreca ka bërë shkeljet të rënda ligjore të kryera jashtë kompetencave të funksionit të tij që cënojnë veprimtarinë e ministrisë gjatë procesit të Maturës Shtetërore 2017.
Karabina ka depozituar pranë Departamentit të Administratës Publike, kërkesën zyrtare për lirimin e menjëhershëm të z. P. Ndreca nga funksioni i Sekretarit të Përgjithshëm.
Në ministritë e tjera, të gjithë ministrat teknikë punojnë me stafet socialiste të gjetura në detyrë, nga zv/ministrat, sekretarët e përgjithshëm etj.. ata kanë pasur mundësi të marrin me vete vetëm atë që njihet si stafi politik, këshilltarë dhe shef kabineti./tesheshi.com/
