Se çfarë ju bën trajneri Jup Heyckens lojtarëve të Bajernit të Mynihut, atë e di vetëm ai, por fakt është që me “Plakushin” në drejtim, bavarezët fitojnë cdo ndeshje dhe kanë krijuar një ambient shumë familjar në klub.
Pasi 72-vjeçari u rikthye nga “pensioni”, Bajern nuk ka humbur asnjë ndeshje, lojtarët janë çliruar, sulmi shënon, Levandovski është kënaqur, Hames po gjen veten, mbrojtësit alternohen në harmoni, Myler ka gjetur vlerën e emrit, Robenit nuk “i iket” nga klubi, Riberisë i është rikthyer humori, Boateng ka rigjetur besimin pas dëmtimeve etj.
Pikërisht ky i fundit e ka deklaruar publikisht se Heyckens duhet të rinovojë të paktën edhe një sezon me klubin. Madje mbrojtësi që gradualisht po gjen formën më të mirë, ka theksuar se ky propozim nuk është thjesht personal, por është mendimi i gjithë skuadrës.
Edhe pse me rikthimin e tij, trajneri e bëri të ditur se vetëm do të mbyllë sezonin, në Bavari të gjithë e duan për më gjatë në krye të skuadrës. Madje aq shumë e dëshirojnë “Plakushin”, saqë vështirë se mund të pranojnë tjetër veç tij. Tani të presim se çfarë mendon vetë Heyckens, sepse klubi dhe lojrarët, ia “pasuan” atij topin. /tesheshi.com/
