Presidenti iranian Hassan Rouhani ka paralajmëruar vazhdimësinë e bashkëpunimit midis Teheranit dhe Moskës në luftën siriane “deri në përmbushjen e objektivit të çrrënjosjes së terrorizmit dhe të rivendosjes së paqes e sigurisë së plotë në rajon”.
Rouhani e bëri këtë premtim gjatë një takimi në Teheran me të dërguarin e Rusisë në Siri, Alexander Lavrentiev, njoftoi IRNA, agjencia shtetërore iraniane e lajmeve.
Sipas fjalëve të Rouhani-t, “situata siriane mund të zgjidhet vetëm përmes dialogut politik dhe me respektim të plotë të vullnetit të popullit sirian, i cili duhet të marrë një vendim të madh dhe përfundimtar në lidhje me të ardhmen e tij”.
Më parë, Rusia ka njoftuar se është gati për bisedime të menjëhershme me Shtetet e Bashkuara për të lehtësuar lirimin e rebelëve nga qyteti i rrethuar i Halepit.
Ministri i Jashtëm rus, Sergei Lavrov, ka njoftuar se ka diskutuar me sekretarin amerikan të Shtetit, John Kerry, në lidhje me propozimet për zgjidhjen e situatës në Halep.
Ndërkohë, ushtria siriane, e cila ndihmohet nga Rusia, ka shtënë nën kontroll edhe një pjesë të Halepit që gjendej më herët në duart e forcave kryengritëse. /tesheshi.com/
