Ai që ishte menduar se mund ta ndalte vrapin e çmendur të Donald Trump-it në garën për të përcaktuar kandidaturën republikane për president të SHBA-ve është tërhequr.
Këshilltarët e senatorit të Teksasit, Ted Cruz-it, i kishin parë votimet paraprake në Indiana si momentin e duhur për ta frenuar Trump-in. Por gjithçka ka rezultuar e kotë, teksa Trump ka fituar sërish.
Donald Trump arriti të sigurojë në Indiana më së paku 51 nga 57 delegatë të mundshëm, duke e çuar numrin e përgjithshëm të delegatëve që e mbështesin atë në 1.047.
Për të garantuar zgjedhjen si kandidat duhen 1.237 delegatë. Ted Cruz kishte 565 delegatë përpara se ta pezullonte fushatën, kurse guvernatori i Ohajos, John Kasich, kundërshtari tashmë i vetëm i Trump-it, por pa shumë shpresa, ka veç 153 delegatë në krah të tij.
Ndryshe nga gjuha e ashpër përpara votimeve në Indiana, Trump ka shprehur konsiderata për Ted Cruz-in pas tërheqjes të këtij të fundit, duke e përshkruar si “një rival të vështirë e inteligjent”.
Në kampin demokrat, Bernie Sanders doli fitues ndaj ish-sekretares amerikane të Shtetit Hillary Clinton po në Indiana.
Senatori i Vermontit arriti të sigurojë 53.2 për qind të votave karshi 46.8 përqindëve të Clinton-it. Megjithatë, Clinton duket shumë më afër kandidimit me 2.202 delegatët e saj, përkundër 1.400 delegatëve të Bernie Sanders-it. /tesheshi.com/
