Aktorja Rajmonda Bulku është vënë së fundi në qendër të vëmendjes në kuadër të debateve mbi fatin e Teatrit Kombëtar. Ajo, ca thënie të saj në fakt, u përzgjodhën nga kryeministri Rama për t’u cituar në funksion të idesë se prishjes së të vjetrit e ndërtimit të të riut. Kjo dhe për faktin se aktorja në fjalë vjen nga kampi politik kundërshtar, si ish-deputete e PD-së, madje prej atyre që dilte në konferenca shtypi të rregullta kundër Ramës.
“Aty duhet të ketë një teatër shumë të mirë, ç’më duhet mua se çfarë ndërtohet anës teatrit, apo mbi teatër. Në qiell le të ndërtohet, s’kam ndonjë gjë; unë dua të ndërtohet një teatër. Nuk ka rëndësi fare se çfarë. Godina e teatrit duhet shembur, pa dyshim. Ne po përjetojmë kushte mizerabël. Unë nuk e di se si punojmë aty, është turp të punosh aty. Tani që u gjet Turbina, shumë mirë, ajo sallë është për atë zonë, atë lagje dhe si ajo duhet të ndërtohet edhe një në Kombinat, edhe një në Laprakë, që padyshim është një lagje afër Tiranës. Unë do të dëshiroja që të ngrihet një Teatër i ri Kombëtar, me parametra të tjerë”, u citua nga Rama.
Por orë më vonë, prej saj vjen një ndryshim qëndrimi.
“Unë jam për një teatër të ri, dhe i qëndroj deklaratave të mia, por jo në dhunim të ligjeve, kolegëve, miqve e shokëve të mi!
Respekto traditën!
Ruaje historinë!
Ndërto teatër të ri, jo duke shkulur të vjetrin! Jam larg dhe me vjen keq që mungoj të jem mes kolegësh në teatër …!!!! Në krahët e mi mbaj mbesën time që më mrekullon dhe dëshiroj që të bëhet aktore teatri….!!!”, shkroi Bulku.
Siç thoshte Safa Ymeri te “Malet me blerim mbuluar” – “politika ngatërron dynjanë”. Por ngatërron dhe individin gjithashtu. /tesheshi.com/
