Presidenti turk u kërkoi dy ditë më parë SHBA-ve të zgjedhin mes Turqisë dhe Fethullah Gylenit, njeriut të bërë përgjegjës për puçin e dështuar ushtarak, e që prej vitesh jeton në Pensilvani. Ekstradimi i tij po kthehet dalëngadalë në një mollë sherri midis dy vendeve, ndërsa duket qartë që në Turqi ka një pakënaqësi në rritje për mosplotësimin e kërkesës së ekstradimit të personit në fjalë.
Zëdhënësja e Departamentit të Shtetit, Elizabeth Trudeau, siç raporton e përditshmja turke Sabah në gjuhën angleze, i është përgjigjur thirrjes së presidentit Erdogan duke thënë se Uashingtoni nuk ka pse të zgjedhë midis Turqisë dhe ekstradimit të Gylenit. Ajo ka lënë të kuptohet se procesi i ekstradimit mund të kërkojë muaj, mbase dhe vite.
Në daljen e përditshme para shtypit, ajo është përballur ditën e djeshme me shumë pyetje që kishin të njëjtin thelb, atë të ekstradimit të personit të kërkuar nga Ankaraja.
Dhe Elizabeth Trudeau do t’i përgjigjej kësisoj njërës pyetje mbi ekstradimin: “Janë dy partnerë të përfshirë në këtë. Eshtë një proces ligjor, teknik. Eshtë e qartë se si zhvillohet ky proces. Ai nuk ndikohet nga emocioni. Nuk ndikohet nga politika. Ne i kemi marrë dokumentet. Ne vazhdojmë t’i këqyrim ato, dhe vazhdojmë të jemi në lidhje të ngushtë mbi këtë me miqtë tanë turq. Por është një proces që përcaktohet nga ligji dhe nga sistemi ligjor.”
Në të njëjtën linjë, ajo i është përgjigjur një pyetje tjetër të ngjashme: “Ky është një proces shumë i gjatë. Nganjëherë mund të marrë muaj, nganjëherë mund të marrë vite.”
Kur është pyetur nëse SHBA-të duhet të zgjedhin midis Turqisë dhe ekstradimit të Gylenit, zëdhënësja e Departamentit të Shtetit ka qenë e prerë në përgjigjen e saj: “Ne nuk kemi nevojë të zgjedhim, qartësisht jo! Por nuk mendoj se është një zgjedhje.”
Për të theksuar po ashtu se, “Pozicioni i SHBA-ve është shumë i qartë. Turqia është mikja jonë, partneri ynë, është aleati ynë i NATO-s. Ne jemi në krah të qeverisë të zgjedhur demokratikisht të Turqisë.”
Turqia po ushtron presion prej kohësh ndaj SHBA-ve për ekstradimin e Gylenit, duke kujtuar se nëse ekstradimi nuk kryhet, kjo mund të ndikojë në marrëdhëniet dypalëshe. /tesheshi.com/
