Kuvendi nisi punimet në legjislaturën e re me seancën konstituive, ndërsa pasdite është prova e parë për mazhorancën socialiste, votimi i Gramoz Ruçit në postin e kryeparlamentarit.
PS ka 74 mandate në Kuvend të mjaftueshme për të zgjedhur Ruçin dhe votëbesuar qeverinë.
Ndërkohë që opozita, PD dhe LSI, numërojnë 62 mandate, ndërsa PDIU dhe Tom Doshi, si ligjvënës i PSD-së, bëjnë 4 vota.
Gjatë seancës së paradites kryeministri Edi Rama ka takuar dy nga deputetët e PDIU-së, Reme Lala dhe Aqif Rakipin.
Nuk dihet nëse ka qenë thjesht një takim formal, apo dy ligjvënësve të PDIU i është kërkuar të votojnë pro kandidaturës së Ruçit dhe miratimit të qeverisë së re.
Pasditja e sotme do të tregojë se çfarë qëndrimi do të mbajnë 3 deputetët e PDIU, por edhe Tom Doshi, që me shumë gjasa janë 4 vota që do të forcojnë pozitat e Ramës dhe mazhorancës socialiste. /tesheshi.com/
