Nëse projekti i stadiumit të ri që do të ndërtohet aty ku sot gjendet i rrënuari “Qemal Stafa” do të ketë vërtetë një kullë të integruar në të, ashtu siç është reklamuar këtë paradite, më së paku kjo nuk do të ishte diçka për t’u lavdëruar.
Presidenti i FSHF-së, Armando Duka, dhe kryeministri Edi Rama kanë paraqitur sot projektin e stadiumit të ri, të quajtur ndryshe dhe “Arena Kombëtare”. Puna për të, gjithmonë sipas shpjegimeve të tyre, do të nisë së shpejti, për të përfunduar brenda dy vitesh.
Stadiumi i ri do të ketë 22 mijë vende, e do të kushtojë 50 milionë euro. Për ndërtimin e saj nuk do të harxhohet asnjë qindarkë, por do të shfrytëzohet partneriteti publik-privat, një term që ka zënë vend së fundi e që më shumë të acaron e të pështjellon sesa të sqaron se nga vijnë e ku shkojnë paratë.
Si presidenti i FSHF-së, ashtu dhe kryeministri i vendit, nuk i kanë kursyer lëvdatat për stadiumin e ri, duke e përshkruar si një nga më të bukurit në Europë.
Por marramendja nga fjalët e bukura ka bërë që të harrohet një element thelbësor, një kullë që i qëndron e brendatrupëzuar në anë stadiumit.
Se ç’mund të jetë ajo kullë e për ç’mund të shërbejë, askush nuk e shpjegoi, por ndërkohë askush nuk pyeti për të. Eshtë respektuar tradita, u tha në paraqitjen e projektit! Vërtet, është respektuar tradita e krijuar së fundi, që një kullë duhet të jetë çdokund!
Nuk e di në ç’projekt tjetër, në ç’stadium tjetër është parë një kullë e ngjashme. Krejtësisht atipike, krejtësisht shpikje. Një kullë e ngjashme nuk ndeshet në asnjë prej stadiumeve të njohura në Europë.
Ta gëzojmë stadiumin e ri, apo ta gëzojmë kullën e re? /tesheshi.com/
