Nga Mensur Krasniqi
Të moshuar e të rinj, burra e gra, me mbulesa e pa mbulesa, njerëz me nevoja të posaçme, të gjithë me flamuj kombëtar, kuq e zi. Kështu dukej pra protesta më madhështore e organizuar ndonjëherë nga opozita shqiptare në Maqedoni.
Në mesin e mijëra protestuesve portali tesheshi.com arriti të kap protestuesin më të vogël, Ilkajin 4-vjeçar, i veshur me tesha kombëtare, që së bashku me babain dhe familjen e tij kishin dalur të ngrejnë zërin kundër regjimit VMRO-BDI.
I pyetur nga portali tesheshi.com, babai i Ilkajit 4-vjeçar, Nuri Alili, se si është e mundur që një fëmijë aq i vogël të marrë pjesë në protesta revolucionare, ai tha se pikërisht më 9 maj, shqiptarët duhet ta shënojnë Ditën e Evropës duke manifestuar standarde dhe vlera evropiane.
Po a e kishte menduar babai i vogëlushit se në protesta të tilla mund të ndodhin dhe trazira? Ja si u përgjigj ai: “or vëlla ne edhe ashtu nuk jemi të sigurt as në shtëpitë e tona nga ky pushtet. Ku ishin fëmijët e Lagjes së Trimave kur ndodhi konflikti? Kështu që më mirë ta kem afër meje dhe të paktën do t’i ngelen si kujtim i hidhur fotografitë se si ka kaluar fëmijëria e tij nga ky regjim, nuk i dihet ndoshta mund ti shërben ndonjëherë si mësim në jetë”, tha Nuri Alili për portalin tesheshi.
Të brengosur për familjarët e tyre dhe shqiptarët në përgjithësi, në protestën e sotme nuk mungoi as mërgata shiptare. Në mesin e tyre një xhaxha në moshë të shtyer kishte ardhur nga Suedia enkas për protestë. Ai nëpërmjet portalit tesheshi.com apeloi deri te të gjithë partitë opozitare shqiptare që të bashkohen për t’ia dhënë goditjen e fundit, siç tha ai, vllezërve Ahmetit dhe Gruevskit.
Ndryshe, në protestën e organizuar nga Këshilli Opozitar shqiptar para qeverisë, mbajtën fjalime kryetari i Lëvizjes Besa, si njëri ndër iniciatorët e themelimit të Këshillit Opozitar dhe kreu i këtij Këshilli, publicisti dhe analisti politik, Kim Mehmeti.
Gjatë fjalimit të tij, Bilall Kasami kishte një porosi të qartë për pushtetin aktual. Ai në emër të 30 mijë shqiptarëve i’u drejtua VMRO-BDI-së, që mos të luajnë me BESËN se po luajnë me zjarrin.
“Jemi këtu t’i tregojmë njëzëri 30 mijë shqiptarëve se nuk do të lejojmë nëpërkëmbjen e shqiptarë, nëpërkëmbjen e besës. Ju themi mos luani me besën se po luani me zjarr, se do të digjeni. Zëri i vërtet i shqiptarëve është këtu sot, para godinës së këtyre krimineleve. Jemi mbledhur këtu që të tregojmë vullnetin politik të shqiptarëve. Të tregojmë se kush janë përfaqësuesit politik të shqiptarëve. Ju themi se ata janë këtu. Të gjithë bisedimet, themi se nuk do të pranohen, pa zërin që është këtu”, ka deklaruar kryetari i Lëvizjes BESA, Bilall Kasami, ndërsa shtoi se “nëse është e nevojshme do të vijnë përsëri tek kjo godinë derisa të mos hiqen këto kriminelë.
Ndërsa sipas Kim Mehmetit, shqiptarët nëpërmjet kësaj proteste duan të tregojnë se kjo Maqedoni do ti ketë keq punët nëse mendon që me “ato”do të bëj shtetin vasal, duke aluaduar në partinë shqiptare në qeveri BDI.
“Ne 26 vite i themi mos ekspiremento me durimin e shqiptarëve sepse atëherë kur shqiptarët të tregojnë sa VMRO-së dhe BDI-së vasale edhe bira e minit do ti duket si tuneli I Kalimashit. Jemi që shqiptarit që e ka humb rrugën ti themi eja se këtu e ke vendin. Ne kemi ardhur të themi se ne nuk e duam Maqedoninë e hajdutëve, I cili varfanjakin e plaçkit dhe e qon në burg, Maqedoninë ku presidenti falë kriminelët, nuk e duam Maqedoninë mëkatare. Maqedonia me shqiptarë të burgosur do të kalbet. Duam të tregojmë se shtetet ku është burgosur shqiptari I pafajshëm ata shtete janë zhdukur ndërsa shqiptarët kanë mbetur. Mos talleni me rininë shqiptarëve sepse atë ditë kur Shkupi do e dëgjoj buçamën e rinisë shqiptare Shkupi do të dridhet”, ka thënë mes tjerash Mehmeti.
Ndryshe, protesta edhe përskaj numrit të madh të protestuesve ka kaluar në një atmosferë të qetë dhe pa asnjë incident. /tesheshi.com/
