Fitorja e Totenhemit në derbin londinez e ka rihapur edhe një herë fort kampionatin anglez. Çelsi kryesues e ka tani vetëm pesë pikë larg Liverpulin e vendit të dytë; pos kësaj, Totenhemi i ndërpreu skuadrës së Conte-s serinë prej 13 fitoresh.
Heroi i ndeshjes qe Dele Alli, me dy gola thuajse të njëjtë, të shënuar me kokë në të njëjtin pozicion. Fitorja 2-0 konfirmon momentin e mirë të Totenhemit, që është ngjitur në vend të tretë në klasifikim. Një statistikë interesante është ajo se Totenhemi nuk ka humbur në asnjë rast në kampionat kur ka shënuar Dele Alli. Ky i fundit u shpall dhe lojtari i ndeshjes.
Një fitore të madhe e quajti trajneri i Totenhemit, Mauricio Pochettino.
“Eshtë një fitore e madhe, një trepikësh shumë i rëndësishëm për të ngushtuar hendekun në krye të tabelës. Qe një ndeshje e fortë; ne po luanim ndaj një prej ekipeve më të mira në Europë, prandaj vlera e kësaj fitoreje është e jashtëzakonshme.”
Çelsi nuk kishte fituar në stadiumin e Totenhemin që nga tetori i 2012-s, ndërkohë që skuadra vendase nuk është mundur këtë sezon në “White Hart Lane”.
“Kjo na bën shumë krenarë. Eshtë një hap përpara për ekipin. Futbolli ka të bëjë me besimin,” deklaroi pas ndeshjes Pochettino.
Derbi i Londrës mbylli javën e 20 të Premier League-s. Kampionati do të rinisë më 14 janar. Totenhemi do të presë atë ditë Uest Bromuiçin, në të parin takim të javës së 21-të, kurse Çelsi do të luajë në fushë kundërshtare ndaj kampionëve të Lestër Sitit. /tesheshi.com/
