Vijon pandalshëm futja e deputetëve të rinj në parlament nga lista opozitare, të cilët shkojnë “kundër rrymës” me djegien e mandateve, duke marrë dhe xanxën “tradhëtar”.
KQZ u dha mandatin Floriana Dhimitrit nga Qarku Gjirokastër, Andi Përmetit nga Qarku Korçë, që të dy të PD-së, si dhe Eugen Bojaxhi nga Qarku Berat, nga lista e LSI-së.
Nga ana tjetër, tre kandidatë të tjerë nga listat e PD, kanë dorëzuar formularin e dekriminalizimit, për të marrë më pas mandatin e deputetit, mes tyre dhe një ballist. Ai është Artur Rroshi nga Partia Balli Kombëtar Demokrat, emri i të cilit gjendet në shumë shpate murale rrugëve të jugut apo ndërtesave të ndryshme, shkruar në urdhërore: Voto Artur Rroshi.
Pra, Rroshi është një tjetër ballist nga lista e PD-së që do futet në parlament, pas Adriatik Alimadhit të Ballit Kombëtar, pa “Demokrat” nga pas. Krahas tij është dhe Zef Shtjefni nga Partia Ora e Shqipërisë, si dhe Nikolin Staka nga Lëvizja Demokratike për Ndryshim. /tesheshi.com/
