Ministri i Drejtësisë Ulsi Manja paralajmëroi çuarjen e të tjerë emrave në Regjimin 41 bis, aty ku nuk ka asgjë veç mureve për një të dënuar.
Në një trajnim me OSBE mbi të drejtat e njeriut për policët e burgjeve që ushtrojnë detyrën në regjimin e posaçëm, ai nënvizoi se gjatë muajit nëntor në regjimin bis u vendosën 4 të dënuar me lidhje me krimin e organizuar.
Manja shtoi se në bashkëpunim me agjencitë ligjzbatuese po vlerësohet rrezikshmëria e disa të dënuarve të tjerë.
Ai shtoi gjithashtu se regjimi i ashpër po funksionon për të ndërprerë komandimin e “ushtarëve” për të kryer krime me urdhra nga burgu.
Aktualisht në regjimin 41 bis janë izoluar 8 të dënuar: Aleksandër Llanaj, Fatmir Pjetri, Arbër Çekaj, Arbjon Aliko, Emiljano Shullazi, Endrit Qyqja, Redjan Rahja dhe Genci Balla.
Po çfarë është Regjimi 41 bis?
Ky regjimi kufizon disa të drejta për të burgosurit apo paraburgosurit:
-Lejohet takimi vetëm me familjarët (paralindurit, të paslindurit, bashkëshortët dhe bashkëjetuesit) dhe takimi do të bëhet në ambjente të përcaktuara.
-Në rast se i burgosuri nuk kryen takime me familjarët, ka të drejtë të ketë bisedë telefonike deri në 10 minuta një herë në muaj.
-Ndalohet përdorimi i sendeve apo parave që i burgosuri mund të marrë nga jashtë.
-Reduktimi i qëndrimit në ajrim deri në dy orë.
-Ndalohen të marrin pjesë në sindikatat apo organe të tjera përfaqësuesish për të burgosurit.
Ndërkohë, veçohet futja aty e Genci Ballës, i cili i përket aferës së dërgimit të shqiptarëve në Siri. Pra, nuk është fjala për një figurë klasike krimi, nga ata që mund të bashkëpunojnë me jashtë.
Po ashtu dhe Arbjon Aliko, i dënuar nën akuzën e ekzekutimit të ish-efektivit të RENEA-s Ibrahim Basha në Lazarat. I riu nuk është pjesë e një aktiviteti të vazhdueshëm kriminal me disa episode, siç i kanë emrat e tjerë të mësipërm. /tesheshi.com/
