Në ka patur rivalitet të ashpër mes trajnerësh në dekadën e fundit, ai ka qenë pa dyshim midis portugezit Jose Mourinho dhe spanjollit Pep Guardiola.
Një rivalitet i nisur kur Guardiola drejtonte Barcelonën, e Mourinho ishte në krye të Interit. Përplasja merr të tjera përmasa kur portugezi merr drejtimin e Realit të Madridit. Eshtë pikërisht koha kur sfidat midis Barcelonës dhe Realit të Madridit të lënë pa frymë. Guardiola më pas kalon te Bajerni i Mynihut, por nuk është e thënë që dy teknikët elitarë të mos vihen karshi-karshi, pasi Mourinho-n e gjejmë te Çelsi.
Mourinho e Guardiola janë përplasur 16 herë mes tyre në pesë veprimtari të ndryshme, me spanjollin që ka fituar shtatë prej sfidave, gjashtë janë barazimet, ndërsa për Mourinho-n ka patur buzëqeshje vetëm në tre takime, ku ka fituar.
Ky rivalitet është transferuar tani në Premier League. Ironi e fatit, apo diçka tjetër, Mourinho e Guardiola janë vënë këtë sezon në krye të dy skuadrave të Mançesterit, Junajtedit dhe Sitit.
Derbi i parë i Mançesterit për këtë sezon do të luhet të shtunën, por më tepër se te ndeshja, vëmendja do të jetë e përqendruar te dy karizmatikët: Mourinho e Guardiola! Kush do të dalë i fituar në rivalitetin në Angli? Mbetet për t’u parë!
Historia e 16 përplasjeve midis dy teknikëve, duke filluar nga 2009-ta, është si vijon:
16 shtator 2009, faza në grupe e Champions League-s: Inter – Barcelona përfundon 0-0! Mourinho drejton Interin, Guardiola drejton Barcelonën.
24 nëntor 2009, faza në grupe e Champions League-s: Barcelona – Inter përfundon 2-0.
20 prill 2010, gjysmëfinalet e Champions League-s: Inter – Barcelona përfundon 3-1.
28 prill 2010, gjysmëfinalet e Champions League-s: Barcelona – Inter përfundon 1-0.
Rivaliteti zhvendoset në Spanjë, pasi Mourinho emërohet trajneri i Realit të Madridit.
29 nëntor 2010, kampionati spanjoll: Barcelona – Real i Madridit përfundon 5-0!
16 prill 2011, kampionati spanjoll: këtë herë ka barazim, Real i Madridit 1-1 Barcelona.
20 prill 2011, finalja e Kupës së Mbretit: Barcelona 0-1 Real i Madridit.
27 prill 2011, gjysmëfinalet e Champions League-s: Real i Madridit – Barcelona mbaron 0-2.
3 maj 2011, gjysmëfinalet e Champions League-s: Barcelona 1-1 Real i Madridit.
14 gusht 2011, Superkupa e Spanjës: Reali i Madridit dhe Barcelona ndahen në barazim 2-2.
17 gusht 2011, Superkupa e Spanjës: Barcelona 3-2 Real i Madridit. Mbase më e jashtëzakonshmja përplasje. Pique deklaron në mbarim të takimit: “Mourinho po e shkatërron futbollin spanjoll!”
10 dhjetor 2011, kampionati spanjoll, Real i Madridit – Barcelona mbyllet 1-3.
18 janar 2012, çerekfinalet e Kupës së Mbretit, Real i Madridit 1-2 Barcelona.
25 janar 2012, çerekfinalet e Kupës së Mbretit, Barcelona 2-2 Real i Madridit.
21 prill 2012, kampionati spanjoll, Barcelona – Reali i Madridit përfundon 1-2.
Guardiola kalon te Bajerni i Mynihut, e Mourinho te Çelsi. Ka vetëm një përplasje mes tyre.
30 gusht 2013, Superkupa e Europës, Bajern i Mynihut – Çelsi ka si rezultat përfundimtar barazimin 2-2. Gjermanët fitojnë 5-4 me 11-metërsha.
Të shtunën, më 10 shtator, në 13:30, Mançester Junajted – Mançester Siti. Rivaliteti mes Mourinho-s dhe Guardiola-s rindizet! /tesheshi.com/
