Mbi qindra bombardime ndodhin çdo ditë në Siri, ndërkohë që bota vetëm po shikon pa ndërmarrë asnjë veprim. Ndërsa oportunistët po përfitojnë gjatë kësaj lufte civile, pavarësisht asaj çfarë po ndodhë, humaniteti akoma po mbijeton në vendin në të cilin mund të thuhet se ai ka vdekur tashmë një kohë të gjatë. Por janë Helmetat e Bardha, të cilët me veprimet e tyre po e demantojnë këtë konstatim, duke u dalë në ndihmë qytetarëve të pafajshëm të cilët janë kapur në mes të kaosit.
Për misionin e tyre heroik, ata madje janë propozuar edhe për çmimin Nobel për Paqe. Që nga ajo kohë, përherë e më shumë tregime heroike të tyre janë dokumentuar nga mediat kryesore botërore.
Tashmë, historia e tyre do të paraqitet në Netflix. Një dokumentar i shkurtër është përgatitur dhe do të prezantohet sot Dokumentari është i bazuar në jetën reale të gjithë asaj çfarë po ndodhë në Siri, duke dëshmuar se si Helmetat e Bardha kanë dhënë jetën e tyre për të qenë të parët të cilët u kanë dalë në ndihmë të mbijetuarve të cilët janë kapur në mes të rrënojave, si pasojë e sulmeve ajrore të forcave siriane dhe atyre ruse.
Motoja e tyre “Të shpëtosh një njeri është si të shpëtosh gjithë njerëzimin”, është reflektim i asaj se çfarë i shtyen ata të bëjnë atë çfarë ata bëjnë. Privilegji i tyre i vetëm është t’u dalin në ndihmë të mbijetuarve. Dhe atë për faktin se e dijnë se askush tjetër nuk do ta bëjë këtë.
Me këtë dokumentar të paraqitur në Netflix, në të cilin do shpalosen veprimet heroike të tyre nga mediat kryesore, me gjasë do të detyrojë botën të bëjë më tepër me qëllim të ndaljes së luftës dhe agresionit ndaj civilëve të pafajshëm.
Bota është duke u zgjuar ngadalë, dhe shpresojmë që një ditë të afërt të gjithë të zgjohemi në mëngjes dhe të dëgjojmë lajmet se lufta në Siri ka marrë fund. /tesheshi.com/
