Kryeministri kinez Li Keqiang do të vizitojë javën e ardhshme Beogradin ku do të bisedojë për një investim të madh kinez në Serbi, por edhe për marrëdhëniet ekonomike në Ballkan.
Burime diplomatike bënë të ditur se ka gjasa që të realizohet një vizitë e papritur e kryeministrit shqiptar Edi Rama në kryeqytetin serb, për të takuar homologun kinez, në mënyrë që të zhbollojë kredinë mbi Rrugën e Arbrit, e cila ka krijuar një ngërç me komunitetin e Dibrës. Një ngërç që tashmë është thelluar edhe më shumë pas lapërdharisë së kryebashkiakut Xhelili, kostoja politike prej brekëve të grisura të së cilit, pritet të jetë jo e vogël.
Por dhe pa këtë zhvillim erotiko-politik të javëve të fundit, po afron fundi i mandatit të parë qeverisës së Edi Ramës dhe premtimi më i pambajtur i tij është padyshim ndërtimi i Rrugës së Arbrit.
Jo vetëm skandali i Shukri Xhelilit, por pikërisht ngrënia e fjalës më këtë aks shumë strategjik për dibranët ka bërë që të anulohet vizita e Ramës në muajin prill në Peshkopi, e cila ishte planifikuar prej kohësh.
Edi Rama e kishte gati të nisur punën e rrugës me anë të një kredie të Bankës Kineze të Investimeve, por që u hodh në erë sipas dibranëve, nga një marrëveshje e fshehtë dhe manovër e Koço Kokëdhimës dhe e një bisnesmeni që ka lidhje me të djathtën.
Deri më tani janë ndërtuar 37 kilometra të Rrugës së Arbrit.
Ka mbetur pa ndërtuar segmenti më i vështirë i saj 26,8 km, me gjerësi 7,5m, një tunel 2,6 km në Murriz (i ngjashëm me një nga tunelet e Krrabës), një tunel 560m në Gurin e Bardhë dhe disa ura.
Kosto e këtij segmenti sipas eksperteve duhet të jetë nga 80 deri 100 milionë euro. Por disa ekspertë të tjerë ia vunë koston 120 milionë euro që pritej të investohet nga Exim Bank.
Intelektualë dibranë që marrin pjesë në shoqatën e Rrugës së Arbrit bëjnë me dije se Koço Kokëdhima dhe D.Teqja kanë negocuar për rritjen e kostos së kredisë në 320 milionë euro, gjë që ka trazuar ujrat dhe ka pezulluar të gjithë procesin.
Mësohet se bisedimet e Kokëdhimës me Teqjen janë zhvilluar në Maqedoni, ku ka marrë pjesë edhe një zyrtar kinez. Kjo ka alarmuar Bankën e Investimeve e cila i ka dërguar një letër zyrtare Ministrisë së Punëve të Jashtme.
Është mister përfshirja e Kokëdhimës në këto negociata, kur ai nuk është deputet i Qarkut Dibër; por kjo nuk habit nëse kemi parasysh prirjen e tij për protagonizëm edhe jashtë sferës së influencës që pat dhënë mandati.
Dhe mësohet se Rama, i alarmuar ka kërkuar të vizitojë personalisht Kinën për të kërkuar zhbllokimin e kredisë.
Por ndërkaq, javën e ardhshme kryeministri i Kinës do të vizitojë Beogradin, ku me këtë rast, për të mos i rënë nga Kina, pritet që Rama të jetë në kryeqytetin serb, një vrap pele larg, për ta takuar.
Rrugën e Arbërit si prioritet qeveritar, e përmendi së fundi dhe deputeti Ulsi Manja, mu në momentin kur doli të flasë për të pabërën e Shukri Xhelilit, si për t’u përcjëllë një mesazh dibranëve se gjesti i Shukes nuk mund ta zhbëjë përkushtimin qeveritar ndaj Dibrës, që si garanci ka përfundimin e rrugës në fjalë. /tesheshi.com/
/tesheshi.com/
