Papunësia, korrupsioni dhe varfëria vazhdojnë të mbeten problemet kryesore në Kosovë. Në sistemin e edukimit problemet kryesore janë nepotizmi, aktivitet korruptive dhe neglizhenca. Kështu u tha në një prezantim të Lëvizjes Fol, e cila ka publikuar hulumtimin e opinionit publik mbi perceptimin, njohuritë dhe përvojat e të rinjve në fushën e korrupsionit në sistemin e edukimit.
Petrit Zogaj, drejtor i Lëvizjes Fol tha se është hera e parë që një hulumtim të tillë për korrupsionin e bëjnë me këtë target grup. Ai tha se synim i këtij hulumtimi ka qenë që të dihen njohuritë dhe përvojat që kanë të rinjtë me korrupsionin.
Fitore Metbala ka bërë prezantimin e hulumtimit, në të cilën kanë qenë të përfshirë 400 nxënës e studentë të 5 komunave të Kosovës.
Sipas këtij hulumtimi, Qeveria vazhdon të jetë më e korruptuara. Situata në sistemin e edukimit vazhdon të përballet me probleme si aktivitete korruptive, keqpërdorim i të mirave materiale, neglizhenca e të tjera.
Arsim Bajrami, ministër i Arsimit, tha se të rinjtë duhet të jenë të mbrojtur nga korrupsioni, për luftimit e së cilit arma më e mirë mbetet edukimi i mirësjelljes dhe vetëdijesimi i të rinjve se korrupsioni është krim.
Ndërsa, James Hope, drejtor i misionit të USAID – it në Kosovë, tha se korrupsioni duhet luftuar, sidomos në sistemin e arsimit, që është baza e një shoqërie.
Hulumtimi është bërë në komunat: Prishtinë, Ferizaj, Gjakovë, Podujevë dhe Mitrovicë. /tesheshi.com/
