Si duket Lëvizja BESA nuk do ta harrojë aq lehtë humbjen e dy deputetëve në zgjedhjet e fundit parlamentare. Ata pretendonin se iu janë vjedhur dy deputetë, pikërisht nga partitë shqiptare BDI-PDSH dhe të njëjtat ia kanë dhuruar partisë maqedonase VMRO-së, pasi që anëtarët e tyre në KSHZ-së i kanë hedhur poshtë ankesat e Lëvizjes BESA mbi parregullsitë zgjedhore si të pabaza.
Andaj sot Forumi Rinor i Lëvizjes BESA ka vazhduar me ironizimet në adresë të BDI-së. Më parë muzeun e VMRO-së e emërtuan me emrin e liderit të BDI-së “Ali Ahmeti”, dhe tani pikërisht këtë muze kanë venosur ta nderojnë me dy artefakte(figura tjera) të cilët sipas besatarëve të rinj kanë kontribuar në fitoren e VMRO-së në këto zgjedhje, ata janë Subhi Jakupi – përfaqësues në KSHZ i Bashkimit Demokratik për Integrim dhe Bedredin Ibrahimi – përfaqësues në KSHZ i Partisë Demokratike Shqiptare.
“Të nderuar gazetarë dhe qytetarë,
Jemi sot këtu, para Muzeut të VMRO-së“Ali Ahmeti”, të cilin e patëm emërtuar ashtu para do kohe, që këtij institucioni kulturor t’ia falim edhe dy artefakte shumë të rëndësishme për këtë muze dhe, në përgjithësi, për historinë e VMRO-së.
Kështu, për shkak të kontributit të madh në mbrojtjen e VMRO-së, të Nikolla Gruevskit, Johan Tarçullovskit dhe të Sasho Mijallkovit, që sidomos u shfaq në mbledhjet e Komisionit Shtetëror të Zgjedhjeve, kur koalicionit “Rilindje me BESË” iu morën dy deputetë dhe iu dhanë VMRO-së, ne – Forumi Rinor i Lëvizjes BESA – kemi vendosur që t’i nderojmë me çmimin “Heroi na VMRO” dy personat që më së shumti kontribuuan për këtë rezultat të VMRO-së. Ata janë Subhi Jakupi – përfaqësues në KSHZ i Bashkimit Demokratik për Integrim dhe Bedredin Ibrahimi – përfaqësues në KSHZ i Partisë Demokratike Shqiptare.
Besoj se në këtë mënyrë Muzeu i VMRO-së “Ali Ahmeti” do të pasurohet edhe me dy artefakte shumë të rëndësishme, ndërsa VMRO-ja do të jetë e nderuar që tashmë mbrojtës të saj nuk janë vetëm maqedonasit, por edhe disa të a.q. shqiptarë.”, kanë thanë nga Forumi Rinor i Lëvizjes BESA. /tesheshi.com/
