Një grup të rinj serbë, kanë manifestuar sot në Beograd kundër asaj që e kanë cilësuar “politikë që po nderon xhelatët që kanë kryer krime në Kosovë”.
Të rinjtë serbë bashkë me me disa shqiptarë të Kosovës kanë kërkuar zbardhjen e masakrës së Suharekës, kur forcat serbe në vitin 1999 zhdukën një fis të tërë, 48 pjesëtarët e familjes Berisha, trupat e të cilëve u dërguan në një varrezë masive në Serbi, e cila u hap në vitin 2001 nga qeveria e kryeministrit Xhingjiq, i cili u vra pikërisht nga kjo politikë e tij.
Të rinjtë serbë kanë ecur në këmbë nga qendra e Beogradit deri në lagjen Batajnicë, 20 kilometra larg, pikërisht aty ku ndodhet varreza masive.
Batajnica, dikur poligon i policisë, sot është e rrethuar me tela dhe për të nuk flitet. Aty nuk ka asnjë shenjë që tregon se atje kanë qenë të varrosura qindra viktima.
“Është shumë afër qendrës së Beogradit dhe është e pabesueshme që për të dihet shumë pak”, ka thënë Jana Vujiq nga Iniciativa e të Rinjve për të Drejtat e Njeriut.
“Gjatë vitit 2001, nga ky vend janë zhvarrosur mbi 700 mbetje të njerëzve të vrarë në Kosovë”, ka kujtuar njëri nga të tubuarit, Ivan Gjuriq.
Gërmimet atje kanë filluar pas rrëzimit të regjimit të Millosheviqit. Por, në Serbi, ende sot, masakra e Suhareksës dhe krimet e tjera të shtetit kujtohen vetëm nga disa organizata joqeveritare.
Familja Berisha është masakruar nga forcat ushtarake dhe paraushtarake serbe më 26 mars të vitit 1999. Disa anëtarë të familjes janë vrarë në shtëpi, të tjerë janë dërguar në një lokal pranë, ku janë masakruar.
Nga masakra kanë mbijetuar vetëm tre anëtarë, ndërsa trupat e disa viktimave nuk janë gjetur ende.
Moto e marshimit në Batajnicë, i cili është përcjellë nga policia, ka qenë: “Tejet të rinj për të kujtuar; të vendosur për të mos harruar”.
“Kur autoritetet manipulojnë me fakte, mohojnë krimet e bëra dhe vënë në dyshim vendimet e Gjykatës së Hagës, atëherë edhe kriminelët shpallen heronj. Disa ministra kanë lavdëruar gjeneralin Llazareviq”, tha Jana Vujiq nga Iniciativa e të Rinjve për të Drejtat e Njeriut.
I dënuari i Hagës, Vlladimir Llazareviq, ish-shef i policisë serbe në Kosovë, ka arritur në Serbi vitin e kaluar, pasi ka kryer dy të tretat e dënimit me burg në Hagë. Ai ka qenë fajtor për urdhërat për vrasje në Kosovë.
Nga Haga në Serbi ka udhëtuar me avion special, i shoqëruar nga ministrat serbë të Mbrojtjes dhe të Drejtësisë.
“Llazareviq në Serbi është pritur si hero popullor. Ministri i Drejtësisë e ka quajtur hero i të rinjve”, ka thënë Jovana Prusina, një tjetër pjesëmarrëse në marshim, duke shtuar se me shpalljen e kriminelëve heronj, udhëheqja e shtetit e kthen Serbinë në kohë të errëta.
Marshimi prej dy orësh e gjysmë, është mbështetur nga Fondi për të Drejtën Humanitare në Serbi, i cili ka ndërmarrë një nismë që në Batajnicë, vendin e varrezës masive, të themelohet një qendër përkujtimore
/tesheshi.com/
