Aleanca e të Rinjve të Kosovës (ARK), sot ka zhvilluar një protestë simbolike para ndërtesës së qeverisë dhe presidencës për të shprehur mospajtimin e tyre me demarkacionin e kufirit me Malin e Zi.
Në shenje pakënaqësie ata kanë vendosur pankarta me mbishkrime të ndryshme: “O minak toka jonë është larë me gjak”, “O gjarpër i zi me kufi mos bon tregti”. Ato i drejtohen kryeministrit të vendit Isa Mustafa.
Kryetarja e të rinjve të AAK-së, Diellza Hoti ka theksuar se si të rinj janë të zhgënjyer me gjendjen në Kosovë, dhe se kjo po ndodh për shkak të kryeministrit dhe presidentes që po tregohen jotransparentë.
“Në bazë të këtij aktiviteti dëshirojmë t’u bëjmë me dije se nuk jemi të kënaqur dhe kërkojmë që të na i marrin parasysh kërkesat tona për arsye se çështjet e demarkacionit me Malin e Zi dhe Asociacioni i komunave me shumicë serbe përbëjnë një problem të madh për ne. E lusim presidenten dhe kryeministrin të na marrin parasysh sepse kjo është çështje nacionale që na prek të gjithë ne”, ka thënë kryetarja e të rinjve të AAK-së.
Sipas ARK-së ky do të jetë paralajmërimi i fundit se nuk do të tolerohet vendosja e kufirit në dëm të Kosovës. Përfaqësuesja e të rinjve, Diellza Hoti, ka deklaruar se protesta është organizuar pa pritur koordinim me opozitarë të tjerë.
“Presim përkrahje në aksionet e tjera nga të rinjtë e partive të tjera opozitare”, ka deklaruar Hoti./tesheshi.com/
