U quajt “monstër” nga kryeministri Rama, por ish-gjyqtarja e Krujës, Enkelejda Hoxha, tashmë në burg, ka tjetër mendim për veten.
Famëkeqe nga fakti se lironte të fortët, ajo thotë se gjithçka e ka bërë me vetëdije të plotë ligjore dhe se, po të kthehej pas dhe njëherë, të njëjtat vendime do merrte.
Ajo dha një intervistë për Euronews Albania, në rrethana burgu, duke thënë madje se mezi pret të rikthehet në detyrë. 
“Më kanë etiketuar me një etiketim monstër, ndërkohë që kurrsesi nuk më përket ai etiketim, nuk jam e tillë.
Sigurisht që dalja nga këtu apo rifillimi i jetës sime do jetë i vështirë, por jam gati të përballem më gjithçka, për sa kohë jam e bindur në gjykimin dhe në ushtrimin e një detyre nga ana ime ashtu siç duhet.
Nëse do kthehem përsëri, pasi është një gjë që do ta kërkoj deri në fund që të kthehem si gjyqtare, do të kthehem më e fortë se më parë”, u shpreh Hoxha për Euronews.
“Janë vendime, gjykime të cilat janë gjykuar mbi bindjen time të brendshme dhe mbi një bindje profesionale gjithmonë në zbatim të ligjit.
Janë çështje, të cilat janë trajtuar, janë shqyrtuar drejtë dhe edhe nëse i kthehem prapë këtyre vendimmarrjeve patjetër do të merrja të njëjtat vendime”, theksoi ajo më tej.
Gjykata e Posaçme e Shkallës së Parë për Korrupsionin dhe Krimin e Organizuar (GJKKO) e ka dënuar Hoxhën me 3 vite burg dhe për shkak të gjykimit të shkurtuar, do të kryejë 2 vite burg. Ish-gjyqtarja ndodhet në paraburgim dhe çështjen e saj e ka dërguar në apelin e GJKKO. /tesheshi.com/
