Nga Blendi Gashi
Opozita kosovare, në muajin shtator të vitit të kaluar arriti të bëhej “një”, përkundër faktit se kishin dallime të mëdha programore.
Tri partitë në opozitë VV, AAK e NISMA i hedhën prapa shpinës mospajtimet eventuale me qëllimin e tyre të përbashkët, rrëzimin e qeverisë PDK-LDK.
Por, ‘martesa’ e tyre u prish në një pikë ku qytetarët veç kishin filluar të mendonin seriozisht se alternativa e vetme për tejkalimin e krizës politike janë zgjedhjet e reja.
Por, pa dhënë ndonjë sqarim të qartë dhe bindës opozita e bashkuar anuloi protestën që e kishin caktuar më datën 26 mars të cilën e proklamonin se do të ishte më e madhja e organizuar ndonjëherë në Kosovë.
Për më keq opozitarët filluan ta fajësojnë njëra – tjetrën për prishje të unitetit.
Edhe pse kanë kaluar më shumë se dy javë pas anulimit të protestës, opozitarët siç duket ende kanë rënë në ujdi se kur duhet të vazhdohet me protestat e radhës dhe kauzën e tyre për ta rrëzuar qeverinë.
Aleanca e Ramush Haradinajt, është partia e vetme opozitare e cila deri më tani ka dalë me një datë se kur duhet të vazhdohet me protestë por një gjë të tillë nuk e ka bërë partia e parë opozitare Vetëvendosje por as NISMA për Kosovën.
Gjasat janë të mëdha që në rast se subjektet opozitare nuk arrinë të merren vesh, AAK-ja e vetme të mbaj protestë kundër qeverisë “Mustafa”, muajin e ardhshëm.
AAK: Protesta e radhës më 14 maj
Zëdhënësi i Aleancës për Ardhmërinë e Kosovë (AAK), Muharrem Nitaj, ka bërë të ditur për portalin tesheshi.com se protesta e radhës do të mbahet më datë 14 maj por nuk ka treguar nëse për këtë datë janë pajtuar edhe dy partitë tjera opozitare.
“Kjo protestë është e të gjithëve dhe ne besojmë se të tillë do ta konsiderojnë edhe partitë politike edhe qytetarët. Ne besojmë fort se jemi në frontin e njëjtë edhe me VV-në edhe me NISMA-n, sepse bashkë e kemi kundërshtuar dhe bashkë do ta detyrojmë këtë qeveri qe t’i hapë rrugë zgjedhjeve të parakohshme, që janë e vetmja rrugë për të dalë nga kjo krizë politike”, ka thënë Nitaj, për tesheshi.com, duke shtuar se protesta do të jetë gjithëpopullore, qytetare e qetë dhe paqësore.
VV dhe NISMA, s’flasin për protestën e radhës
Për dallim nga AAK, që është deklaruar për datën e protestës së radhës, dy partite tjera opozitare Vetëvendosje dhe NISMA për Kosovën nuk e kanë parë të rrugës të flasin për këtë çështje.
Gjatë gjithë ditës portal tesheshi.com ka tentuar të marrë një qëndrim nga drejtues të Lëvizjes Vetëvendosje, por telefonin nuk e ka hapur as zëdhënësi i Lëvizjes por as disa deputetë që i kemi telefonuar.
I vetmi që është përgjigjur në telefon nga VV, është anëtari i saj, Sami Kurteshi, ish Avokati i Popullit, i cili ka thënë për tesheshi.com se për më shumë se dy javë ka qenë jashtë vendit dhe nuk nuk është në dijeni se çfarë kanë biseduar partitë opozitare për protestën e radhës.
Portali mbarëkombëtar tesheshi.com ka kontaktuar edhe sekretarin e përgjithshëm të partisë NISMA për Kosovën, Bilall Sherifi, për të marrë një qëndrim rreth protestës së paralajmëruar në muajin e ardhshëm, por ai ka thënë se nuk dëshiron të flasë pasi është ditë pushimi.
/tesheshi.com/
