Në Komisonin e Ekonomisë, teksa diskutohej mbi ndryshimet e reja në ligjin për pronat e sekuestruara, deputeti socialist Ervin Bushati ofroi një shifër goxha të lartë parash, që sipas tij krimi i organizuar qarkullon në një vit.
“Krimi i organizuar në Shqipëri mund të shkojë në 1.5 miliard dollarë në vit aktivitet”, tha Bushati, duke mbrojtur praktikën e sekuestrove në kuadër të Operacionit Forca e Ligjit.
“Krimi i organizuar nuk është pasion. Kriminelët e bëjnë për fitime financiare.
Duke i marrë pronën patjetër që e ndalon krimin. Sekuestrimi i pronave duhet të shikohet si shpërndarje. Shoqërisë duhet t’i rikthehen këto prona. Krimi administron prona dhe aktivitetet të shumta. Nuk ka kthim prapa në këtë pjesë. Këtu flasim për përmasa shumë të mëdha. Janë më shumë se dëmet e tërmetit”, argumentoi Bushati. Ai hodhi dhe idenë që pronat e sekuestruara të vihen në shërbim të atyre që janë dëmtuar nga tërmeti.
“Ç’a të keqeje kishte që në këto prona të futeshin personat që nuk kanë shtëpi. Nuk duhet parë si shpronësim por shpërndarje me ligj e pronave”, theksoi deputeti socialist. /tesheshi.com/
