Liga e Europës mund të jenë një aktivitet shumë më pak i vlerësuar se Liga e Kampionëve, e megjithatë as në të nuk mungojnë befasitë, lojërat e bukura, rezultatet surprizë, eliminimet surprizë.
Kështu ngjau në takimet e dyta të një të gjashtëmbëdhjetave, të luajtura një ditë më parë. Nga të gjashtëmbëdhjetë takimet mund të veçohet fillimisht rezultati më i thellë, ai në takimin Olimpik i Lionit – AZ Alkmar. Skuadra franceze fitoi 7-1, teksa e kishte fituar dhe takimin e parë 1-4; çka do të thotë se holandezët kanë pësuar plot 11 gola në dy sfida.
I bujshëm qe eliminimi i Totenhemit, që dhe në këtë veprimtari u shfaq po aq dobët sa në Champions League. Ndaj Gentit belg u barazua 2-2 në Londër, me ndeshjen e parë të humbur 1-0.
Më e pamenduar ajo që ndodhi në “Artemio Franchi” të Firences, ku vendasit kryesonin 2-0 pas 28 minutash, e pos kësaj e kishin fituar dhe takimin e parë, 0-1, në Gjermani ndaj Borusias së Mynshegladbahut.
Gjithçka dukej punë e mbaruar për Fiorentinën, por që nga minuta e 44-t e gjer në 60-n vërshon stuhia e miqve, që shënojnë katër herë në portën vendase. Përfundimi 2-4 u dha të drejtë gjermanëve të kalojnë në një të tetat.
Një kualifikim i papritur ishte dhe ai i Selta Vigos, që ndaj Shakhtar Donjeckut kishte humbur 0-1 një javë më parë e në transfertë fitoi 0-2 pas shtesave 15-minutëshe.
Nuk pati të njëjtin fat skuadra tjetër spanjolle, Atletik Bilbao, e eliminuar nga qipriotët e APOEL-it. Pritësit fituan 2-0 në Nikozia, me ndeshjen e parë të përfunduar 3-2 për spanjollët.
Ndeshjet e tjera përfunduan me këto rezultate: Fenerbahçe 1-1 Krasnodar, Osmanllëspor 0-3 Olimpiakos, Genk 1-0 Astra, Kopenhagen 0-0 Ludogorec, Sparta e Pragës 1-1 Rostov, Sent-Etjen 0-1 Mançester Junajted, Shalke 1-1 PAOK, Ajaks 1-0 Legia e Varshavës, Zenit 3-1 Anderleht, Roma 0-1 Vilareal, Beshiktash 2-1 Hapoel Bir Sheva.
Të 16 skuadrat e kualifikuara për në një të tetat e Ligës së Europës janë këto: Krasnodar, Olimpiakos, Genk, Kopenhagen, Selta Vigo, Gent, Rostov, Borusia e Mynshegladbahut, Olimpik i Lionit, Mançester Junajted, Shalke, APOEL, Ajaks, Anderleht, Roma dhe Beshiktash. /tesheshi.com/
