Të paidentifikuarat: nga kush dhe pse janë vrarë 46 gra?

Interpoli dhe Policia në gjashtë vende evropiane po rihapin hetimet për rastet e 46 grave që u vranë ose vdiqën në rrethana të dyshimta dhe identiteti i të cilave nuk dihet, njoftoi agjencia ndërkombëtare e Policisë.

“Ne duam t’u japim përgjigje familjeve dhe të sigurojmë drejtësi për viktimat”, tha në një deklaratë të martën Sekretari i Përgjithshëm i Interpolit, Jurgen Stock.

Nisma vjen pas apelit të Interpolit të vitit 2023 “Identify Me” për të identifikuar 22 gra të vdekura që vdiqën në rrethana të dyshimta, gjë që tërhoqi rreth 1800 këshilla nga publiku dhe çoi në identifikimin e një gruaje britanike të vrarë 31 vjet më parë në Belgjikë, Rita Roberts.

Vdekje misterioze

Fushata që filloi në vitin 2023 në Belgjikë, Gjermani dhe Holandë është zgjeruar në Francë, Itali dhe Spanjë.

“Edhe pjesa më e vogël e informacionit mund të jetë çelësi për zgjidhjen e këtyre rasteve të pazgjidhura,” tha Stock.

“Pavarësisht nëse është një kujtim, një këshillë apo një histori e përbashkët, edhe detaji më i vogël mund të ndihmojë në zbulimin e së vërtetës”.

Roberts u identifikua bazuar në një tatuazh të një luleje të zezë me gjethe jeshile që një anëtar i familjes e njohu.

Forca policore do të kombinojë metodat analitike dhe mjeko-ligjore, si profilizimi i ADN-së dhe rindërtimi i fytyrës, në një përpjekje për të identifikuar 46 gratë.

Interpoli gjithashtu publikoi në faqen e tij të internetit informacione për trupa të paidentifikuar që tradicionalisht qarkullojnë vetëm në mesin e Policisë. /tesheshi.com/