Bashkëthemeluesi dhe këngëtari i grupit të njohur rrok, Pink Floyd, Roger Waters, bëri thirrje për pjesëmarrje në lëvizjen Bojkot, Privim dhe Sanksione – Boycott, Divestment and Sanctions (BDS) për të drejtat palestineze, në një intervistë për RT, një pjesë e së cilës u botua të enjten.
Thirrja e Waters vjen në kohën kur një tjetër bandë rroku, Radiohead, refuzoi të marrë pjesë në lëvizjen BDS, duke mbajtur një koncert në Izrael në muajin korrik.
Aktivistët e BDS-së, përfshirë Waters, kërkuan nga Radiohead që të anulojë koncertin e tij në Tel Aviv, si shenjë proteste ndaj shtypjes së palestinezëve nga izraelitët në prag të 50 vjetorit të pushtimit të Palestinës nga Izraeli.
Waters tha se performimi në Izrael do të thotë të miratosh qeverinë dhe politikat e saj kundër palestinezëve.
Radiohead refuzoi thirrjen, ndërkohë që këngëtari Yorke mbrojti mbajtjen e koncertit.
Sipas Yorke, të performosh diku nuk do të thotë të miratosh qeverinë e atij vendi. Ai tha se grupi i tij nuk e mbështet presidentin Donald Trump, por ende mban koncerte në SHBA.
Legjenda e Pink Floyd u përgjigj duke thënë se rasti i Izraelit ishte ndryshe nga të tjerët.
“Thom Yorke e ka gabim kur thotë se nuk po miraton politikat e qeverisë izraelite duke performuar atje. Zëdhënësit e asaj qeverie kanë thënë se janë shumë të ngazëllyer, dhe se kjo është gjëja më e mirë që u ka ndodhur për hasbarin e tyre (fjala hebraike për “propagandën”), që shpjegon para pjesës tjetër të botës se çfarë demokracie e mrekullueshme dhe e çmuar është Izraeli”, tha me ironi Waters.
Ai barazoi performimin në Izrael me një deklaratë publike për miratim të qeverisë izraelite, “sepse kjo është ajo që do të raportohet në Izrael dhe në të gjithë botën”.
Waters shtoi se performimi në SHBA gjatë presidencës së Trump është në rregull, sepse shoqëria civile amerikane nuk u ka bërë thirrje artistëve nga jashtë të mos vijnë, ndërsa shoqëria civile palestineze u bashkua dhe organizoi lëvizjen BDS.
Kur u pyet për mungesën e mbështetjes që merr BDS (në kuptim të mbulimit të aktiviteteve të tyre nga mediat), këngëtari i Pink Floyd u përgjigj duke thënë se “ajo vjen nga lart”.
“Ju mund t’a kuptoni vetë këtë, kjo nuk është ndonjë shkencë astronomike”, tha Waters.
BDS është një lëvizje e udhëhequr nga palestinezët, që lobon për bojkotimin e Izraelit dhe produkteve të tij, lidhur me pushtimin e tokës palestineze.
Në faqen e internetit thuhet se BDS ishte “frymëzuar nga lëvizja anti-aparteid e Afrikës së Jugut”. /tesheshi.com/
