Zgjedhjet e zhvilluara së fundmi në Gjermani, veç rikonfirmimit të Angela Merkelit për një tjetër mandat si kancelare, treguan një rënie drastike të të majtëve socialdemokratë, që arritën të marrin vetëm 20 % të votave. Edhe unioni CDU/CSU pati një rënie mjaft të madhe, por arriti të ruajë kryesimin, pavarësisht se statistikat tregojnë se mbështetja ndaj tyre është më e ulët se në 1949.
Në Britaninë e Madhe, qershorin e kaluar fituan konservatorët e Theresa May, ndërsa laburistët e Jeremy Corby u rrëzuan keqazi, megjithëse para zgjedhjeve vinin bast gjithçka se do të fitonin.
Në Francë, ish-Presidenti François Hollande u tërhoq nga gara për një mandate të dytë, pasi sondazhet e nxirrnin të katërtin, pas Emmanuel Macron, François Fillon, Marine le Pen.
Për më tepër, qeveria e Hollande ishte e mbushur me kriza të njëpasnjëshme. Në zgjedhje socialistët morrën vetëm 6.3 përqind, rezultati më i keq historik i tyre.
Në zgjedhjet e marsit në Holandë, Mark Rutte i qendrës së djathtë fitoi, ndërsa socialdemokratët pësuan një rënie drastike nga 24.8 në 5.7 përqind.
Po kështu në Spanjë, socialistët ndodhen nën kuotat e 22 %, ndërsa në zgjedhjet e 2016 trimfoi Partia Popullore e Mariano Rajoy.
Në Hungari, partia e kryeministrit Viiktor Orban, duket se do të korrë një tjetër fitore në zgjedhjet e ardhshme, pavarësisht se ka një rënie të mbështetjes, sipas sondazheve.
Nga të gjitha zgjedhjet e zhvilluara në Europë, ajo që bie në sy është një ngritje e frikshme e partive të ekstremit të djathtë, që në platformmat e tyre kanë si bazë anti-emigracionin. Kjo u pa në Gjermani, Francë e Holandë, ndërsa partitë tradicionale të majta shkuan drejt shpërbërjes.
E kundërta ndodh në Shqipëri. Në zgjedhjet e fundit Partia Socialiste fitoi më shumë mandate deputetësh se 4 vite më parë, sikundër LSI një tjetër parti e majtë pati një rritje në elektorat krahasuar me zgjedhjet e fundit. Ajo që u tkurr ishte Partia Demokratike, që përfaqëson qendrën e djathtë.
Dy partitë e majta, pavarësisht akuzave dhe dyshimeve për një proçes të ndershëm zgjedhor, sot zotërojnë rreth 2/3 e vendeve në Parlament, ose 67 të tij. gj.k. /tesheshi.com/
