I shtrirë për pesë palë qejfe në makinën zyrtare të qeverisë, zv.ministri i Bujqësisë së Kosovës, Shukri Maxhuni as që e kishte menduar se paparacët e mediave sociale e kishin fotografuar.
Zv.ministri Maxhuni, njëri nga 70 sa i ka qeveria Haradinaj, u kap me këmbë të zbathura dhe të shtrira në automjetin zyrtar, i cili qarkullonte nëpër autostradën “Ibrahim Rugova”.
E menjëherë pas daljeve në rrjet të fotografive, pasoi edhe shkarkimi i tij nga kryeministri.
“Sot kam liruar nga detyra zëvendësministrin e Ministrisë së Bujqësisë, Pylltarisë dhe Zhvillimit Rural, Shukri Maxhuni”, shkroi Haradinaj në rrjetin social Facebook.
Pos kryeministrit, largimin nga detyra të zëvendësministrit e ka kërkuar edhe Kryetari i AKR-së, Behgjet Pacolli, parti kjo nga e cila vjen Maxhuni.
Pacolli e kishte përshkruar si “të pahijshme” sjelljen e Maxhunit në veturën zyrtare. /tesheshi.com/
