Deri në 2019-tën është kontrata aktuale e mesfushorit francez Paul Pogba me Juventusin, por duket se ajo nuk do të respektohet kurrë. Vetëm pak orë e ndajnë largimin e 23-vjeçarit drejt Anglisë, aty ku do të kthehet në një mjedis të njohur mirë prej tij.
Transferimi i Pogba-së është thuajse punë e mbaruar, pasi të gjitha mediat sportive njoftojnë se marrëveshja për kalimin e tij te Mançester Junajtedi do të zyrtarizohet brenda më pak se 48 orëve.
Në Milano ka patur një takim mes dy figurave me peshë te Juventusi e Mançester Junajtedi, Giuseppe Marotta-s e Ed Woodward-it, si dhe agjentit të Pogba-së, Mino Raiola-s. Flitet për një kontratë pesëvjeçare, me një pagesë 13 milionë euro në sezon për mesfushorin.
Pogba do të kalonte në vitin 2012 te Juventusi pasi nuk arriti t’i bindte drejtuesit e Mançester Junajtedit për aftësitë e tij. Në katër sezone ai u kthye në një prej lojtarëve më të kërkuar nga klubet e njohura europiane. 3.5 milionë euro e bleu Juventusi asokohe, kurse tani flitet për një shumë që sillet te 120 milionë euro.
Francezi ka bërë deri tani 178 paraqitje me Juventusin, duke shënuar 34 gola e duke dhënë 43 pasime për gol.
Juventusi është në një fushatë të ethshme shitblerjesh. Mes shumë blerjeve, më e zëshmja është ajo e sulmuesit argjentinas, Gonzalo Higuain-it. Kurse largimi më i zëshëm do të jetë pa dyshim ai i Pogba-së nëse gjithçka shkon sipas parashikimeve. /tesheshi.com/
