Të jetosh me zemër derri!

Një amerikan, i cili ishte në fazën e fundir të një sëmundjeje zemre, iu nënshtrua një transplanti gjenetikisht të modifikuar të zemrës së një derri, operacioni i parë të këtij lloji. Tre ditë më pas, pacienti shfaqet i shëruar, njoftuan mjekët e tij të hënën.

Operacioni, i kryer nga një ekip i Universitetit të Mjekësisë në Maryland, është ndër operacionet e para të tilla që synojnë të demonstrojnë fizibilitetin e transplantimit të zemrës së një derri në trupin e njeriut, një zonë e mundësuar nga mjetet e reja të “redaktimit” të gjeneve. Nëse ky transplant rezulton i suksesshëm, shkencëtarët shpresojnë se organet e derrit do të kompensojnë me sukses mungesën e organeve njerëzore të donatorëve.

“Ky ishte një operacion revolucionar që na solli një hap më afër zgjidhjes së krizës së mungesës së organeve njerëzore. Thjesht nuk ka mjaft zemra njerëzore në furnizimet e donatorëve për të mbushur listën e gjatë të pacientëve të mundshëm që kanë nevojë për to,” tha Bartley Griffith, i cili kreu operacionin për të implantuar zemrën e një derri tek një njeri.

“Ne vazhdojmë me kujdes, por jemi optimistë që ky operacion i parë në botë i këtij lloji do të ofrojë një mundësi të re të rëndësishme për pacientët në të ardhmen”.

Veshkat, mëlçia, mushkëritë…

Për 57-vjeçarin David Bennett nga Maryland, ky transplant ishte shansi i tij i fundit.

“Ishte ose të vdisja ose të shkoja për këtë transplant. Unë dua të jetoj. Unë e di se kjo është një ‘goditje qorre’, por ky është shansi im i fundit,” tha Bennett një ditë para operacionit, sipas një deklarate nga universiteti.

Për të mundësuar realizimin e këtij operacioni eksperimental, universitetit i është dhënë më parë drita jeshile nga Administrata Amerikane e Ushqimit dhe Barnave (FDA).

“FDA përdori të dhënat tona dhe të dhënat e një derri eksperimental për të miratuar një transplant në fazën e fundit të sëmundjes së zemrës së një pacienti që nuk kishte asnjë mundësi tjetër trajtimi,” tha Muhammad Mohiudinn, i cili drejton programin e ksentransplantacionit të universitetit.

Organe të tjera të derrit që po testohen për transplantim njerëzor përfshijnë veshkat, mëlçinë dhe mushkëritë.

Përpjekjet e mëparshme për transplantim nga derrat te njerëzit kanë dështuar për shkak të dallimeve gjenetike që shkaktuan refuzimin e organeve ose për shkak të viruseve që përbënin rrezik infeksioni.

Shkencëtarët e kanë trajtuar këtë problem duke hequr gjenet potencialisht të dëmshme. /tesheshi.com/