Jordanezi Yasin es-Sukur prej 33 vitesh jeton në të njëjtën shtëpi me gjarpërinjtë, të cilët janë bërë pjesë e pazëvendësueshme e jetës së tij.
Sukur, 55 vjeç, i cili jeton në veri të Jordanisë, bazuar në përvojën e fituar nga babai i tij, rrit gjarpërinjtë e shumtë në shtëpi. Ai përdor edhe fjalë plot dashuri dhe vëmendje për këto kafshë shtëpiake.
Sukur, kur bëhet fjalë për gjarpërinjtë, zotëron aftësi me të cilat jo shumë njerëz mund të mburren. Mund të mbajë në duar çdo specie, por edhe t’i kap pa vështirësi, pavarësisht nëse është helmues apo jo. Shumë e konsiderojnë ekspert të gjarpërinjve. Ai ka folur për Anadolu Agency (AA) për përvojën dhe dashurinë e tij për këto kafshë të llojit zvarranik që hem të kallin datën e hem ta shpifin.
Ai tha se jeton me gjarpërinjtë që nga viti 1989 dhe dashurinë për ta ia ka përcjellë vajzës së tij 14-vjeçare Melek.
Sukur shpesh paraqitet si “dashnor i gjarpërinjve”.
“Meqë kam përvoja të ndryshme në trajtimin e gjarpërinjve, kafshimet e gjarpërinjve mund të trajtohen edhe me antidot”, tha Sukur, i cili shtoi se çdo gjarpëri mund t’i afrohet me lehtësi.
Ai theksoi se kishte mësuar nga eksperti palestinez Jamal Amwasi se si të dallonte helmuesin nga johelmuesi.
“Në Jordani ka 37 lloje gjarpërinjsh. Nga këto, shtatë specie kanë helm vdekjeprurës, pjesa tjetër janë jo helmuese. Për më tepër, ato mund të jenë të dobishme për mjedisin dhe njerëzit”, theksoi Sukur.
Ai shtoi se gjalpa palestineze është një nga llojet më të rrezikshme të dredhkës
helmuese dhe se një mpiksje gjaku mund të ndodhë si rezultat i pickimit prej tyre. Ai shpjegoi gjithashtu se Echis Coloratus është një specie endemike karakteristike e Lindjes së Mesme dhe pickimi i saj çon në hollimin e gjakut. Sipas tij, kafshimet e këtyre gjarpërinjve mund të jenë vdekjeprurëse.
Ai foli gjithashtu për një specie të quajtur Atractaspis, helmi i të cilit mund të vrasë në një minutë deri në 18 minuta. Ai theksoi se kjo specie nuk lëviz gjatë ditës, por gjatë natës dhe se mund të shtiren si të vdekur kur vërejnë një njeri.
Sukur tha se kjo specie shihet rrallë në Jordani.
Katër vjet më parë, ai themeloi një grup për të mbrojtur kafshët e egra, por edhe për të parandaluar vrasjen e pajustifikuar të gjarpërinjve.
Sukur theksoi se pavarësisht vështirësive që hasën në fillim, arritën të sensibilizojnë njerëzit dhe se ideja e vrasjes së gjarpërinjve u kthye në një ide për t’i mbrojtur ato, për të mos i rrezikuar dhe vënë nën kontroll.
“Ne kemi një ekip ekspertësh nga të gjitha vendet arabe dhe ndihmojmë njëri-tjetrin kur bëhet fjalë për kafshimet e gjarpërinjve. Ekziston një metodë e ndryshme për t’u marrë me gjarpërinjtë. Shpresojmë që të interesuarit të fokusohen në këtë çështje për t’i kthyer
helmet që kemi në serum në vend që të marrin antidotin nga jashtë”, tha Sukur.
Ai shtoi se vitin e kaluar janë regjistruar 196 raste të kafshimit të gjarpërinjve dhe pesë prej tyre kanë përfunduar me vdekje.
Ai beson se gjarpërinjtë nuk duhen vrarë nëse janë apo jo helmues, pasi kjo prish ekuilibrin ekologjik. /tesheshi.com/
