Nga Gjergji Koja
Nga dita e mërkurë, qeveria “Rama2” ka nisur zyrtarisht detyrën, ndërsa përballja e parë do të jetë me reformën në administratë.
Kjo jo vetëm për shkak të shkrirjes dhe bashkimit të disa institucioneve dhe agjensive, por edhe për faktin se referuar marrëveshjes së 2013-ës mes PS dhe LSI, rreth 30 % e administratës së shtetit i përkiste partisë që drejtohej nga Ilir Meta, sot pjesë e opozitës.
E ndërsa kanë nisur shkarkime dhe dorëheqje, interesant është fakti se çdo të bëjnë ministrat socialistë me drejtuesit e disa prej institucioneve që kanë në varësi.
Një prej tyre është edhe Haki Çako, Drejtor i Përgjithshëm i Policisë së Shtetit, në detyrë prej rreth 3 vitesh dhe i akuzuar për kanabizimin e vendit, emërimet në polici të personave të inkriminuar, apo skandalin i përgjimeve përmes pajisjes Imsi Catcher.
Në bazë të ligjit për Policinë e Shtetit, Drejtori i Përgjithshëm shkarkohet me propozim të ministrit të Brendshëm dhe miratim të qeverisë. Ligji përcakton se drejtori ka një mandat 5-vjeçar me të drejtë rizgjedhjeje, por mund të shkarkohet për shkak të performacës së dobët në detyrë.
Burime qeveritare bëjnë të ditur se në kuadër të përmirësimit të punës së policisë, përmbushjes së objektivave dhe prioriteteve, por edhe për t’i dhënë punës së policisë një impuls të ri, do të propozohet ndryshimi i Drejtorit të Përgjithshëm të Policisë. Referuar edhe ligjit, propozimi do të bëhet nga ministri përgjegjës, në rastin konkret Fatmir Xhafaj.
Madje sikundër ndodh, kanë nisur të lakohen edhe emrat e parë që konsiderohen si kandidatë për këtë detyrë. Janë të paktën dy drejtues policie që shihen si kandidatë të mundshëm, njëri prej të cilëve në një funksion drejtues të rëndësishëm në strukturat e Ministrisë së Brendshme.
Haki Çako, ndoshta pa e menduar u bë protagonist edhe në skandalin e fundit, atë mbi mosfunksionimin e radarëve që monitorojnë hapësirën detare, duke ngritur hije dyshimi se ato qëllimisht nxirreshin jashtë funksionit, duke bërë që aksionet e policisë kundër trafikantëve të drogës të dështonin.
Çako informonte Dritan Demirajn në ditët e fundit të punës së tij si ministër i Brendshëm mbi problematikën, ndërkohë që në brigjet italiane u sekuestruan disa tonelata me drogë.
Denoncimi i Çakos solli reagimin e Ministrisë së Mbrojtjes, nga e cila varet edhe qendra e monitorimit detar, që mohonte pretendimet e ngritura. Madje në të njëjtën gjatësi vale me Ministrinë e Mbrojtjes, mbante edhe drejtoresha e kufirit dhe migracionit, që është në strukturë varësie me kryepolicin.
Ndoshta përmes këtij informacioni, kreu i Policisë së Shtetit po largonte përgjegjësinë nga supet në lidhje me skafet që udhëtonin nga brigjet shqiptare drejt Italisë. Por në anën tjetër mund të jetë edhe një justifikim, për atë që pritet të ndodhë, shkarkim nga detyra për shkak se nxorri një informacion jo fort të lehtë për t´u kapërdirë.
Por duket se në rastin e Çakos, kryeministri apo ministri i Brendshëm kanë një fushë të lirë veprimi, që vështirë se do të gjejnë kundërshti nga opozitat. Drejtuesit e dy partive në opozitë, përfshi këtu edhe Presidentin aktual, Ilir Meta, prej muajsh e quajnë kryepolicin shqiptar “Haki droga”, referuar sasisë së madhe të kultivimit të hashashit gjatë dy viteve të fundit.
Ndaj dhe me një lëvizje të tillë, kryeministri kënaq deri diku edhe opozitën.
Dhe në këtë drejtim, shkarkimi mund të quhet edhe “konsensual”, pasi asnjë prej drejtuesve të partive opozitare nuk do të mund të merrte në mbrojtje një drejtor që sulmohet prej kohësh po prej tyre. /tesheshi.com/
