Ministrja e Arsimit në kabinetin qeverisës të Francës, Najat Vallaud-Belkacem, ka bërë të njohur në fillim të kësaj jave një sërë planesh për ta përmirësuar sistemin arsimor në vend. E në një prej këtyre planeve është dhe përfshirja e arabishtes në mes pesë gjuhëve që mund të zgjidhen për t’u dhënë mësim për nxënësit në shkollat fillore.
“Arabishtja do të jepet mësim në shkollat fillore nëse janë burimet njerëzore dhe nëse prindërit e kërkojnë këtë,” i ka deklaruar ministrja transmetuesit francez BFM.
Ajo ka theksuar se arabishtja është gjuhë zyrtare e 26 vendeve në Afrikë dhe në Gadishullin Arabik.
Shumica e muslimanëve francezë vijnë nga vendet arabishtfolëse në Afrikën e Veriut, nga Algjeria, Maroku e Tunizia, sipas një raporti nga Brookings Institution.
Por nisma e Ministres së Arsimit nuk është pritur mirë nga segmente të caktuara të politikës franceze, përgjithësisht të së djathtës ekstreme. Reagimet kanë qenë të ashpra, si për shembull, ai i Louis Aliot-it, që i përket Frontit Nacional, e që nuk përton ta quajë këtë herezi!
“Të rinjtë nuk kanë nevojë për këtë herezi, por [kanë nevojë për] forcim të programeve të frëngjishtes e historisë, për një asimilim të suksesshëm,” shkruan ai në Twitter.
Një deputet i parlamentit të Francës, Bruno Le Maire, i ka deklaruar të njëjtit transmetues, “Eshtë kultura franceze që duhet studiuar së pari në Francë.”
Një tjetër i ka kërkuar ministres të dorëhiqet. “Me sa duket, ju nuk e doni Francën,” është shprehur Jean-Frederic Poisson i kristiandemokratëve.
Deputetja e republikanëve, Annie Genevard, e ka quajtur një “kalë troje” dhënien mësim të arabishtes.
Franca ka bashkësinë më të madhe muslimane në Europë. Çmohet se gjashtë deri në dhjetë për qind e banorëve francezë janë muslimanë. Një raport i Brookings Institution, i quajtur “Të jesh musliman në Francë”, vlerëson se në Francë janë pesë milionë qytetarë me prejardhje muslimane, duke e quajtur Islamin fe të dytë në vend pas Katolicizmit. /tesheshi.com/
