Në edicionin special, një vit nga sulmi mbi zyrat e saj në Paris, Charlie Hebdo ka zhgënjyer shumë njerëz. Në faqet e saj përfshihet edhe një karikaturë ku diçitura sugjeron se vogëlushi i mbytur sirian, Aylan Kurdi, nëse do të ishte rritur, mund të kishte qenë një agresor seksual, duke e lidhur ngjarjen me ngjarjen e Këlnit.
Karikatura ka tronditur opinionin, ndërsa kritikat online shkojnë nga ato për abuzim me lirinë e të shprehurit e deri në akuza për racizëm. Nëntitulli “Emigrantët” përfshin karikatura që tregojnë imazhe nga ngjarjet e fundit në Europë. Në njërën prej tyre tregohen dy burra me gjuhën që u varet jashtë duke ndjekur dy gra të tmerruara që largohen me vrap. Në insertin e faqes shfaqet imazhi që ka bërë xhiron e botës, ai i trevjeçarit sirian me fytyrë në rërë pasi deti e ka nxjerrë të pajetë. Pyetja në krye të karikaturës është: “Çfarë do të bëhej Aylani i vogël nëse do të rritej?”. Dhe përgjigja në fund të faqes : “Ndjekës grash në Gjermani”.
Sugjerimi se të gjithë refugjatët që do të rriten në Europë do të bëhen të tillë, ka ndezur një zemërim të vërtetë në publik, por ka ende njerëz që e kanë mbrojtur karikaturën dhe e kanë interpretuar si një satirë që tabloidi francez ka sjellë për perceptimin e refugjatëve.
Vdekja e Kurdit në një plazh të Turqisë vitin e kaluar elektrizoi opinionin publik dhe nxiti simpati të gjerë për krizën humanitare të refugjatëve sikundër edhe vendosi nën presion qeveritë europiane të bëjnë më shumë.
Por, opinion publik tashmë është në dilemë pas pretendimeve për qindra sulme në prag të vitit të ri në Këln të Gjermanisë, që iu atribuohen refugjatëve.
Edicioni special i Charlie Hebdo u publikua në përvjetorin e sulmit,, Në atë kohë, organizatat e lirisë së shtypit u ngritën për të kërkuar mbrojtjen e zërave “ndryshe” në media.
Ndërkaq, pas këtij edicioni, një numër i madh gazetarësh janë kthyer kundër revistës në një debat të provokuar nga toni racist i mbulimit të krizës së refugjatëve në Europë.
Sunny Hundal e quan atë “të neveritshme”.
Gazetari i Financial Times, Christopher Thompson sugjeron se mund të mos jetë racizëm por një përpjekje për të shpëlarë stereotipet ndaj emigrantëve.
Por, libiano-amerikani Hend Amry ndjehet i ofenduar dhe e interpreton karikaturën e Charlie Hebdo duke thënë “se sipas revistës vogëlushi I mbytur sirian po të rritej, do të ngacmonte gratë gjermane”.
Në një koment në Twitter, një përdorues shkruan se revista po fshihet pas parimeve të satirës dhe lirisë së shprehjes, por në fakt është raciste.
Korrespondentja e ABC-së për Lindjen e Mesme, Sophie McNeill shkruan në Twitter se karikatura është “indinjuese” dhe shumë komentatorë bashkohen me mendimin e saj./tesheshi.com/
Përgatiti: Juli Prifti
