Shqipëria është vendosur në grupin A të EURO 2016-ës, përballë Francës, Rumanisë dhe Zvicrës, përfaqësuese këto që kishin kërkuar të ishin në një grup me shqiponjat. Mirëpo, menjëherë pas kumtimit të shortit, përfaqësuesit e këtyre kombëtareve kanë shprehur frikën nga kuqezinjtë, pasi e shohin mjaft të vështirë të marrin maksimumin në përballjen me ta.
Kreu i futbollit francez, Noel Le Great, ka kërkuar përqendrim maksimal për ndeshjen me Shqipërinë, pasi kujton përfundimin e sfidave të fundit të gjelave me të.
“Shqipëria është një kundërshtar i fortë që ne ende nuk e kemi mposhtur. Morëm një barazim me të në shtëpi dhe një humbje atje. Duhet të përqendrohemi që të mos përsërisim gabimet,” deklaroi ai.
Ndërkohë, nga përfaqësuesja helvete, shortin e ka komentuar trajneri Vladimir Petroviç, që sfidën ndaj Shqipërisë e shikon si një derbi me shumë bukuri brenda.
“Shumë shpresuan, dhe ja ku vjen ky derbi, që është i bukur për t’u luajtur, sepse sfida të tilla mbartin emocion. Por e rëndësishme është që gjithçka të zhvillohet brenda kufijve të sportivitetit, ku të dyja skuadrat të kërkojnë fitoren, meqë e kanë dhe ndeshjen e pare.”
Në kampin rumun, ishte presidenti i Federatës së Futbollit, Razvan Burleanu, ai që e komentoi shortin dhe përballjen me Shqipërinë.
“Jemi të lumtur me shortin. Unë personalisht nuk e doja Francën, por të gjithë lojtarët e mi e kërkonin atë, për të luajtur në ndeshjen hapëse. Zvicra është njëri prej kundërshtarëve më të fortë të vazos së dytë, kurse Shqipërinë e donim nga vazoja e katërt,” tha ai për faqen zyrtare të UEFA-s, uefa.com. /tesheshi.com/
