Luan Rama, kryetari i grupit parlamentar të LSI-së, i sapoardhur në këtë post, nuk ka bërë asnjë diferencë me Ylli Manjanin, gjatë deklaratave që ka dhënë në Top Story.
Përveç çështjes së “dashnoreve”, që nuk e ka specifikuar, të gjitha akuzat e tjera të Manjanit kanë dalë nga goja e Ramës së LSI-së në mënyrë të rrjedhshme, madje duke e përforcuar me termin se “unë po jap qëndrimin zyrtar të Lëvizjes Socialiste për Integrim”.
Por ka shtuar më pas se “LSI është për të ruajtur të majtën e bashkuar, pasi atë e kemi krijuar vetë”.
Si përkthehet kjo deklaratë dhe a do të rrijë Meta në koalicion me Ramën më 18 qershor?!
Po të ndjekësh performancën e LSI-së gjatë zgjedhjeve të vitit 2009, ku ndodhi trauma mes të majtës dhe ta krahasosh me gjendjen e sotme, gjen shumë gjëra që përputhen.
Në vitin 2009, LSI vinte nga nga disa zhvillime përplasëse me PS-në, që nga pakënaqësia për ndarjen e pushtetit të bashkive, reforma zgjedhore dhe ajo kushtetuese Rama-Berisha, greva e urisë etj.
Por megjithëse ka pasur akuza të bëra nga eksponentë të caktuar të LSI-së ndaj PS-së dhe Edi Ramës, asnjëherë nuk u tha nga LSI se kjo forcë politike do të garonte kundër së majtës, apo që mund të bënte koalicion me Sali Berishën.
Po ç’ndodhi?!
Ilir Meta ndërmori një luftë të ashpër në bashkitë ku kishte koalicion me PS-në, duke rrëzuar buxhetet dhe i lënë në impas kryetarët e zgjedhur socialistë, ndërkohë që vetë kreu i LSI-së paralel me këto zhvillime, fliste për një bashkim të së majtës.
Madje dy muaj para zgjedhjeve të 18 qershorit 2009, Ilir Meta u takua me Fatos Nanon, dolën së bashku në një konferencë shtypi dhe i kërkuan Edi Ramës që të bashkohen në një koalicion të “ së majtës së bashkuar”.
Pas kësaj, Meta gjatë fushatës akuzoi Edi Ramën se ishte ai që nuk e donte të majtën bashkë, pasi sipas tij, nuk është i tillë dhe i kujtoi rrahjen e shpatullave të Sali Berishës në Gërdec.
E në fund ndodhi ajo që dihet. LSI doli e vetme në zgjedhje, mori 4 deputetë dhe më pas pasi e justifikoi qëndrimin e saj me stabilitetin dhe proceset integruese për t’u bashkuar me Berishën.
Edhe këtë herë, gati duket e njëjta performancë, por me situatë të ndryshme, pasi PS nuk është në opozitë por në pushtet.
Javën e fundit, Ilir Meta, ka ndërmarrë presionin më të madh ndaj Edi Ramës për të arritur shkarkimin e Saimir Tahirit nga posti i Ministrit të Brendshëm dhe ka përdorur në këtë sulm frontal “artilerinë” më të rëndë të LSI-së dhe gjeneralët e tij ministra.
Për ta shpjeguar situatën: Rama dy javë më parë ka kërkuar largimin e Ylli Manjanit.
Ilir Meta si kundërpërgjigje ka sulmuar Saimir Tahirin, duke shkaktuar një plagë të rëndë në koalicion.
Të hënën në mëngjes, pasi nuk ka ardhur dorëheqja e Manjanit, Edi Rama, ka lajmëruar nëpërmjet sekretarit se po i shkon Ilir Metës në zyrë dhe i ka thënë tekstualisht: “Harroje largimin e Tahirit, por bëj atë që të them, vendos këtë të duash në vend të tij”, dhe i ka dorëzuar kërkesën për shkarkimin e Ylli Manjanit.
Ilir Meta, ka zëvendësuar Manjanin me Vasilin dhe ka hapur fjalën se ka qenë Ministri i tij i Drejtësisë, i cili nuk ka pranuar që të largohej; pra ka thyer urdhërin.
Një hipotezë që është larg mendjes të pranohet, pasi kur ka pasur një rast të ngjashëm, Ilir Meta jo vetëm që e ka larguar me ceremoni por edhe e ka ndëshkuar ashpër.
Duhen fakte? Ju kujtohet Dritan Prifti në 2010-n që nuk largohej nga detyra e Ministrit të Energjitikës dhe Meta mblodhi kryesinë duke i përmendur edhe origjinën moçalore!
Po Edmond Haxhinasto, pak muaj më pare, që nuk ikte dhe madje përdori edhe influencën e Edi Ramës për të bindur Metën që ishte ministër shumë i mirë.
E shkarkoi pikërisht pas dhënies së tenderit të Rrugës së Kombit për kompaninë turke.
Dhe madje nuk e vendosi në asnjë post drejtues në LSI.
Por situata mes PS-së dhe LSI-së, apo më mirë të thuhet mes Edi Ramës dhe Ilir Metës, ka krijuar një hendek të madh, që është hapur nga akuzat edhe më të ashpra se opozita në lidhje me hashashin dhe korrupsionin.
Madje edhe për Klement Balilin, LSI akuzon PS-në si fajtore në moskapjen e tij.
Nëse lidhin aleancë për zgjedhjet e 18 qershorit, si do të dalin së bashku Rama dhe Meta për të mbrojtur qeverisjen 4-vjeçare, kur Meta rrëzon publikisht lejtmotivin e mandatit të qeverisë së Edi Ramës?
Nëse vërtetë do të qepet e çara e krijuar, atëherë do të duhet ose që Meta të dalë publikisht dhe të thotë që akuzat e LSI kanë qenë të ekzagjeruara, ose që Rama të pranojë publikisht se për hashashin ka faj Ministria e Brendshme dhe Saimir Tahiri.
Rrugë të tretë nuk ka dhe sipas të gjitha gjasave palët do të shkojnë në ultimatum deri në vendimin final për koalicion.
Nga ajo që tha Luan Rama mbrëmë, kjo forcë politike do të kërkojë “të majtën e bashkuar”, pra një koalicion bazë PS-LSI dhe PDIU e FRD të jenë si “bishta”.
Por këtë nuk e pranon Rama, i cili e do Shpëtim Idrizin, siç e ka thënë vetë publikisht, “bashkëkryetar të koalicionit”.
Ilir Meta, sipas të gjitha gjasave do të largohet duke e fajësuar Edi Ramën se ka prishur “të majtën e bashkuar”.
Fiks si në 2009-n…/tesheshi.com/
