Shpenzimet në shëndetësi përgjithësisht janë të lidhura me jetëgjatësinë e njerëzve, pra sa më të larta të jenë ato aq më shumë jetojnë qytetarët e një shteti. Por duket se në dy raste ekstreme kjo lidhje nuk ekziston. Nëse i referohemi të dhënave nga OECD, SHBA shpenzon 9982 dollarë për frymë në shërndetësi, por përsa i takon jetëgjatësisë renditen të 27-ët, ku sipas përllogaritjeve ajo shkon deri në 78 vite e 9 muaj.
Në anën tjetër është Shqipëria, e cila shpenzon për shëndetësinë 614 dollarë për frymë, vlera më e vogël krahasuar me të gjitha vendet e rajonit, ose 16 herë më pas se SHBA. Por jetëgjatësia e shqiptarëve është 78 vjet, ose 9 muaj më pas sesa e amerikanëve.
Edhe krahasuar me gjashtë vendet e Ballkanit Perëndimor, shqiptarët janë më jetëgjatë, ndërkohë që janë të fundit në rajon për shpenzimet, shkruan Monitor. Serbët, të cilët sipas të dhënave të OBSH-së për të njëjtin vit shpenzojnë dyfishin e shqiptarëve, jetojnë afërsisht dy vite e gjysmë më pak. Krahasuar me rajonin, Shqipëria ka shpenzimet më të ulëta si përqindje e Prodhimit të Brendshëm Bruto. Shpenzimet për shëndetësinë zënë 17.2% të Prodhimit të Brendshëm Bruto në Amerikë dhe vetëm 2.9% të PBB-së në Shqipëri.
Më jetëgjatët në botë
Japonia është populli me jetëgjatë në botë sipas të dhënave nga OECD, ku një japonez pret që të jetojë 83 vite e 10 muaj. Më pas renditen zviceranët dhe spanjollët me 83 vite, italianët me 82 vite e shtatë muaj, islandezët me 82 vite e gjysmë.
Megjithëse presin të jetojnë më gjatë se popujt e tjerë, japonezët renditen të 15-t për sa i përket shpenzimeve për frymë në shëndetësi (4,519$). Zviceranët renditen të dytët pas amerikanëve për shpenzimet më të larta për frymë (7,919$).
Krahasuar me vendet anëtare të OECD-së, e cila promovon politika për të përmirësuar mirëqenien, jetëgjatësia në Amerikë pritet të jetë 78.8 vite duke u renditur e 27-a. Sipas OECD-së, amerikanët janë ndër popujt më obezë, kryesojnë për sa i përket vdekjeve të lidhura me varësinë ndaj drogave, dhe renditen të 23-të për sa i përket përhapjes së sëmundjeve të diabetit.
Ndryshe nga një pjesë e vendeve të OECD-së, Shtetet e Bashkuara më së shumti mbështeten në sigurimet vullnetare për të financuar kostot e përkujdesit shëndetësor. Në krahasim, 10 vendet me jetëgjatësinë më të lartë mbështeten te kontributet vullnetare vetëm në 6% të kostove, ndërsa shpenzimet qeveritare mbulojnë më shumë se gjysma./tesheshi.com/
