Largimi i Haki Çakos nga kreu i Policisë së Shtetit i jep fund një odiseje më shumë se 3-mujore përplasjeje ndërmjet Ministrit të Brendshëm Fatmir Xhafaj dhe Kryeministrit Edi Rama.
Siç mësohet, Xhafaj edhe pse e ka pasur institucionalisht krahun e djathtë, ai nuk ka komunikuar asnjëherë me Drejtorin e Përgjithshëm të Shtetit. Largimi i Çakos, i sulmuar fuqishëm edhe nga opozita, pritej dhe ishte thjesht një çështje kohe. Por koha erdhi tani në janar, pikërisht në periudhën e shpallur për të nisur gjuetinë e “Peshqve të Mëdhenj”. Çako, siç dhe rezultoi e ka mbaruar epokën e tij dhe nuk mund të ishte njeriu që do të ndërmerrte drejtimin e një operacioni të madh i cili kërkon edhe figure të pakontestuar.
Haki Çako erdhi në krye të Policisë së Shtetit në vitin 2014 pas largimit të Artan Didit. Ai mori lavdinë e operacionit të Lazaratit, pasi ishte Drejtor i Policisë së Gjirokastrës në atë kohë. Suksesi i atij operacioni i dha edhe një medalje që e dërgoi direkt në krye të policisë, duke marrë komandën e uniformave blu.
Por Çako, edhe pse ishte një zgjedhje e Saimir Tahirit, shpesh ka pasur përplasje me ministrin e Brendshëm të saj kohe, kryesisht për çështje emërimesh të krerëve të policisë. Operacioni më i madh që drejtoi Haki Çako ishte kalimi pa problem i zgjedhjeve të 25 qershorit dhe më pas ndalimi i kultivimit të kanabisit në Shqipëri.
Haki Çako, megjithëse e dinte se nuk mund të qëndronte gjatë, ai nuk pranoi asnjëherë kërkesën për dorëheqje nga ana e ministrit Xhafaj, që ky i fundi ia ka bërë më se njëherë. Ky është edhe misteri më i madh i mbretërimit të Çakos, që padyshim pritet të zgjidhet së shpejti, kur ai të flasë publikisht (nëse do ta bëjë këtë gjë).
Çako, i cili e ka nisur karrierën në Policinë e Shtetit dy vjet pa rënë komunizmi, ka pasur përvojë në uniformat blu në të gjitha qeveritë e Shqipërisë. Por vetëm ne ardhjen e Saimir Tahirit, ai u ngjit në kupolën më të lartë të bluve. Dhe sipas të gjitha gjasave, nëse Tahiri është një viktimë e kanabisit që u kultivua e u trafikua në gjithë vendin pas rënies së Lazaratit, edhe Çako nuk do të shpëtojë pa gjë.
Postin e parë të lartë, Haki Çako e ka marrë në vitin 1998 kur u emërua si shef i Komisariatit të Kuçovës. Ndërkohë, pak kohë më pas për rreth dy vjet ai u dërgua në Tiranë si shef i policisë kriminale në Komisariatin nr.1. Të njëjtën detyrë e kryen pas 3 vjeësh në Komisariatin nr.3 në kryeqytet, për t’u emëruar më pas si kreu i Zyrës kundër drogave të forta në Drejtorinë e Policisë. Në vitin 2003 dërgohet si shef Komisariati në Vlorë, ku qëndron deri në vitin 2006, kur tashmë në pushtet kishte ardhur PD-ja. Për tre vjet është larguar nga Policia për t’u rikthyer në vitin 2010, ku thirret si shef i Luftës ndaj narkotikëve në Drejtorinë e Policisë Tiranë ku punon deri në vitin 2012. E heqin nga kjo detyrë duke e lënë specialist deri në vitin 2013, kur me ardhjen e socialistëve në qeveri emërohet drejtor i Polcisë së Gjirokastrës.
Haki Çako është një nga krerët më jetëgjatë të Policisë së Shtetit. Ai është një oficer karriere, i specializuar dhe me përvojë specifike në sektorin kundër drogës. Por ai përveç vlerësimit, ka qenë zyrtari më i sulmuar pas Edi Ramës dhe Saimir Tahirit nga ana e opozitës për çështjen e kanabisit.
Cila është e vërteta mbi këtë çështje dhe kush është në të vërtetë Haki Çako padyshim që mund mund të zbardhet sot, sepse kërkon kohë me ftohjen e gjërave. Por që e vërteta e kësaj historie të jetë sa më e plotë, i takon Haki Çakos tani të rrëfejë gjithçka. Sepse në fund të fundit ai nuk është politikan. Por nga politika morri xanxën “Haki droga”! /tesheshi.com/
