Nga Ylli Pata
Një debat jo i vogël ka shpërthyer në kryesinë e Partisë Socialiste në lidhje me ndryshimet që pritet të ndodhin brenda mazhorancës, pas deklaratës së Bashkim Finos që do të largohen të gjithë ata që kanë pasur rezultate të dobëta në zgjedhjet e 25 qershorit.
Ndërsa në publik është perceptuar si një zhvillim që ka të bëjë kryesisht me drejtuesit lokalë socialistë, por edhe me kryetarë bashkish, e vërteta është që Edi Rama ka përgatitur një normë ndryshe matje performancash në zgjedhje.
Kryeministri ka bërë të ditur se matësi i tij për të parë performancën politike do të jetë numri i votave që PS ka marrë më 25 qershor dhe jo mandatet e fituara, të cilët kanë ardhur edhe si pasojë e strategjisë së ndjekur nga Rama, kur i vetëm doli nëpër Shqipëri për të kërkuar timonin e famshëm.
Dhe në bazë të numrave që kanë dalë nga çdo qark, është hartuar një hartë e re politike e PS-së, e cila nuk është gjithmonë është simetrike me shpërndarjen e deputetëve.
Përveç numrit të votave, Edi Rama dhe stafi i tij ndërkombëtar që ndjek strategjinë politike, ka listuar edhe territoret ku janë marrë votat e reja të PS-së; që do të thotë se votat që janë shtuar vijnë nga e djathta, sektori i ashtuquajtur gri, apo nga pjesë të shoqërisë së paangazhuar politkisht.
Dhe nga ky vëzhgim kanë ardhur të dhëna suprizuese.
Për shembull, në qarkun Shkodër, edhe pse PS ka marrë të njëjtin numër deputetësh me vitin 2013, ajo ka pasur një rritje votash kryesisht në moshat e reja dhe në territorin “armik”, pra vota që dikur i përkisnin të djathtës(kryesisht partive të vjetra), madje edhe vetë Partisë Demokratike.
Në Tiranë, edhe pse PS-ja ka marrë një numër më të madh deputetësh se viti 2013, numri i përgjithshëm i votave të marra ka qenë më i vogël se katër vjet më parë, madje edhe në zona të rëndësishme si bastione. Ky fenomen është vënë re edhe në “Stalingradin” socialist siç është njësia nr 5.
Kjo ka ndodhur përgjithësisht nga ulja e numrit të përgjithshëm të votuesve; pra në Tiranë kanë marrë pjesë në zgjedhje më pak qytetarë dhe firimi i elektoratit nuk ka dëmtuar vetëm PD-në, megjithëse ajo është dëmtuar më shumë.
Kjo skemë mësohet se ka goditur mjaft figura të rëndësishme në PS, të cilët Rama u ka dhënë një provë për të rritur shkallën e mbështetjes, por rezultatet që kanë sjellë nuk përbëjnë rekord.
Sekretari Organizativ i PS-së, Bashkim Fino deklaroi në mbledhjen e Asamblesë se janë 10 krerë degësh që duhet të rregullojnë “dypunësimin” e tyre. Sipas urdhrit, krerët e degëve të PS-së që njëkohësisht janë të punësuar në një post tjetër si prefekt apo drejtorë të një institucioni, duhet të heqin dorë prej njërit nga funksionet. Kjo do të ndodh brenda këtyre 10 ditëve.
Por kjo është vetëm maja e ajsbergut që pritet të dalë në breg për zgjedhjet lokale të vitit 2019. Edi Rama ka përgatitur një strategji krejt suprizë, ku do të promovojë të gjithë kapacitetet që kanë sjellë këtë ndryshim sasior dhe cilësor të votës dhe jo ato drejtues që kanë mësuar hilet duke siguruar zonat e influencës që sjellin statukuonë aktuale.
Rama pritet të futet së shpejti në një operacion brenda militancës së LSI-së e cila ka pasur një marrëdhënie të ngushtë me administratën. Urdhëri i ardhur nga lart ka qenë që nëse lëvizen drejtorët, të mos preken militantët. Me to do të sillen ndryshe dhe pa sjellë përplasje. /tesheshi.com/
