Të fshehtat e Asamblesë të PS-së: ja kush e ka siguruar vendin në qeverinë “Rama 2”

Nga Ylli Pata

Socialistët mbledhin të dielën Asamblenë Kombëtare ku Edi Rama shpall qeverinë e re dhe prioritetet për katër vite qeverisjeje.

Burime të tesheshi.com bëjnë të ditur se i vetmi njeri që ka siguruar deri sot hyrjen në qeverinë “Rama 2” është Niko Peleshi, i cili përveç postit të Zv.kryeministrit do të ketë edhe një dikaster shumë të rëndësishme për reformën në administratë.

Vetë Peleshi ka përgatitur strukturën e re të ekzekutivit, i cili do të ketë vetëm 11 portofole ministrore.

Ndërkaq, Edi Rama pritet t’u telefonojë brenda ditës së enjte 10 emrave që ai ka përzgjedhur për të marrë në ekipin qeverisës, të cilat do t’i paraqesë në mbledhjen e Asamblesë, që zhvillohet të dielën më 27 gusht.

Dje Rama ka mbyllur pushimet zyrtarisht dhe ka hyrë në zyrë pas 20 ditëve shplodhjeje politike.

Ditën e djeshme, në vilën qeveritare të Durrësit kryeministri ka pritur këshilltarin e tij par exellenxe Tony Blair, për t’i dhënë dorën e fundit programit ekonomik, ku pritet të ketë si thelb projektin e investimeve 1 miliardë dollarë.

Një burim shumë i lartë në PS i tha tesheshi.com se të dielën do të prezantohen edhe kandidaturat e PS-së për kryetar Kuvendi, ndërkohë që Gramoz Ruçi do të mbajë një fjalim të posaçëm ku do të ketë një ofertë politikë institucionale për Partinë Demokratike; ofertë që bën fjalë për drejtimin së bashku të Kuvendit, në bazë të një rregulloreje që siguron barazi si për mazhorancën edhe opozitën, por jo kaos dhe fjalime pa fund.

Ruçi gjithashtu pritet të prezantojë edhe programin e reformave institucionale, ku do të propozojë në Kuvend që ky proces të drejtohet nga Partia Demokratike.

Në lidhje me emrat e ministrave ka një situatë totalisht ankthi dhe padije brenda PS-së.

Asnjë nuk e di se kush do të thirret, ndonëse ka pasur mjaft lobime nga korridore pushteti në PS, që të ndikonin që ministrat e rinj të jenë deputetë.

Burimi i lartë në PS bëri të ditur se ka një sinjal që më shumë se 2/3 e ekzekutivit të ri do të jenë anëtarë të Parlamentit, por gjithsesi kjo ende mbetet një enigmë.

Sinjale ka që Edi Rama ka thirrur dy figura të rëndësishme nga diaspora në qeverinë e re, por sërish këto mbeten në kuadrin e fjalëve që qarkullojnë në korridoret e selisë rozë.

Punimet e asamblesë do të fillojnë me prezantimin e 5 raporteve të grupeve të punës, që u ngritën me urdhër të kryetarit Edi Rama pas zgjedhjeve parlamentare të 25 qershorit.

Në bazë të axhendës së punimeve, i pari të do të prezantohet raporti i hartuar nga grupi i punës për veprimtarinë parlamentare.

Më pas do të diskutohet për raportin mbi dëgjesat publike, në një pjesë të të cilave ka qenë i pranishëm edhe vetë Kryeministri Rama. /tesheshi.com/