Debatet e ashpra në komisionin e Ligjeve në lidhje me nisjen e procedurave për emërimin e një kryeprokurori që do të zëvendësonte Adriatik Llallën me përfundimin e mandatit të tij më 7 dhjetor, kanë përfshirë edhe faktorin ndërkombëtar.
Ambasadori amerikan, Donald Lu dhe shefja e misionit të BE-së në Tiranë, Romana Vlahutin shprehen në të njëjtën linjë duke kërkuar që Kuvendi të zbatojë ligjin. “Kushtetuta flet qarte dhe SHBA e BE mbështesin opionin ligjor të OPDAT dhe EURALIUS”, thonë ata.
“Kushtetuta dhe ligji për Prokurorinë janë të qarta. Ambasada e Shteteve të Bashkuara mbështet opinionin ligjor që OPDAT dhe EURALIUS i kanë dhënë Parlamentit. Ne nxisim Parlamentin të zbatojë ligjin” thuhet në deklaratën e shperndare nga ambasada e SHBA-se. OPDAT dhe EURALIUS janë shprehur më parë për zgjedhjen e një kryeprokurori të ri pavarësisht se nuk janë ngritur ende institucionet e reja të reformës në Drejtësi.
Në të njëjtën linjë vjen edhe deklarata e delegacionit te BE: “Ligji për organizimin dhe funksionimin e prokurorisë parashikon dispozita të qarta transitore – siç konfirmohet nga EURALIUS dhe OPDAT në opinionin e tyre në Kuvend. Ne e ftojmë Kuvendin të procedojë në respekt të plotë të ligjit”, thuhet në deklaratën e BE.
Më 21 nëntor ekspertët e EURALIUS dhe OPDAT bënë një intepretim ligjor ku sugjerojnë që prokurori i Përgjithshëm Adriatik Llalla nuk mund të qëndrojë në detyrë përtej datës 7 dhjetor, datë kur i përfundon mandati. Ata sugjerojnë që prokurorin e ri të përkohshëm duhet të jetë një nga prokurorët më me eksperiencë siç parashikon neni 109 i ligji për prokurorinë dhe Parlamenti duhet ta zgjedhë me shumicë të thjeshtë votash. /tesheshi.com/
